Danaha wadajirka ah ee Afrika ee helidda kursi joogto ah oo Golaha Ammaanka ah waxay xaqiijinayaan caddaalad taariikhi ah – Maxamuud Cali Yuusuf

Addis Ababa, Dharabley 19/2018 (ENA): Guddoomiyaha Komishinka Midowga Afrika Maxamuud Cali Yuusuf ayaa sheegay in rabitaanka wadajirka ah ee Afrika ee ku aaddan helidda xubinimo joogto ah oo Golaha Ammaanka ee Qaramada Midoobay ah uu yahay mid xaqiijinaya caddaalad taariikhi ah isla markaana suurtagelinaya sinnaanta.

Waxa uu xusay in Afrika muddo dheer ka maqnaanshaha matalaad joogto ah ay su’aal gelinayso kalsoonida Golaha Ammaanka, isla markaana tani ay tahay cillad qaab-dhismeed oo u baahan in la saxo.

Golaha Ammaanka ee Qaramada Midoobay ayaa shalay qabtay kulan heer sare ah oo dood dadweyne ah. Guddoomiyaha Komishinka Midowga Afrika ayaa khudbad uu si fogaan-arag ah uga jeediyay kulankaas ku sheegay in Afrika si adag u rumeysan tahay in caqabadaha caalamka aan lagu xallin karin si gooni-gooni ah.

Maxamuud Cali Yuusuf waxa uu carrabka ku adkeeyay in sharciga caalamiga ah loo baahan yahay in loo dabaqo si la jaanqaadaysa fahamka taariikhda, gaar ahaan marka la eego raadadka gumeysiga iyo cadaalad-darrada qaab-dhismeed ee weli saameynta leh.

Waxa uu intaa ku daray in ka go’naanta Afrika ee nabadda ay tahay mid dhab ah, isagoo tusaale u soo qaatay kaalinta ay ka qaadato hawlgallada nabad-ilaalinta, naf-hurnimada ciidamada ammaanka, mudnaanta la siiyo nidaamka sharciga halkii xoog laga adeegsan lahaa, iyo iskaashiga adag ee u dhexeeya Midowga Afrika iyo Qaramada Midoobay ee arrimaha nabadda.

Inkasta oo Afrika wax badan ku biirisay nabadda iyo ammaanka caalamka, haddana Guddoomiyuhu wuxuu sheegay in cadaalad-darro weli ka jirto matalaadda ay ku leedahay fagaaraha caalamiga ah, taasoo noqotay dhibaato aasaasi ah.

Afrika oo ka kooban 55 dal isla markaana leh qiyaastii 1.4 bilyan oo qof, ayuu yiri, weli ma helin kursi joogto ah Golaha Ammaanka tan iyo markii la aas aasay Qaramada Midoobay ku dhowaad 80 sano ka hor. Arrintan ayuu ku tilmaamay mid aan kaliya ahayn cadaalad-darro, balse sidoo kale dhaawacaysa kalsoonida Golaha.

Guddoomiyaha Komishinka Midowga Afrika waxa uu carrabka ku adkeeyay in danaha wadajirka ah ee Afrika ay yihiin helidda matalaad joogto ah oo Golaha Ammaanka ah, lana helo dhammaan xuquuqaha la socda. Tani, ayuu sheegay, waxay horseedi doontaa sinnaanta, wax-ku-oolnimo nidaamka caalamiga ah, iyo xaqiijinta caddaalad taariikhi ah. Sida ay sheegayso xogta laga helayo Midowga Afrika.

#WWI 
#Wakaaladda_Wararka_Itoobiya