Xisbiga Barwaaqo wuxuu xoojinayaa hawlihii uu ka bilaabay kor u qaadista ka faa’iideysiga shacabka dhammaan waaxyaha – Aadan Faarax

Addis Ababa, Dharabley 8/2018 (ENA): Ku-xigeenka Madaxweynaha Xisbiga Barwaaqo ahna Madaxa Xarunta Isku-duwidda Dhismaha Nidaamka Dimuqraadiyadda lehna awood Ra’iisul Wasaare Ku-xigeen, Aadan Faarax, ayaa sheegay in xisbigu sii xoojin doono hawlihii uu ka bilaabay dhammaan waaxyaha si kor loogu qaado ka faa’iideysiga shacabka.

Madasha qiimeynta waxqabadka lixda bilood ee xisbiga oo ka socotay magaalada Hosaanaa ayaa lagu soo gabagabeeyay iyadoo dib loo eegay hawlaha laga qabtay abuurista fursadaha shaqo iyo xasilinta suuqa.

Aadan Faarax ayaa sheegay in hirgelinta jihada dhaqaale ee ku dhisan kala-duwanaansho waaxeed ay keentay natiijooyin la taaban karo.

Wuxuu xusay in lixdii bilood ee la soo dhaafay la diiwaangeliyay natiijooyin rajo leh, kadib markii si ficil ah loo hirgeliyay abuurista shaqooyin ku saleysan xirfad, taas oo ballaarisay ka faa’iideysiga muwaadiniinta ee fursadaha shaqo.

Si loo sii adkeeyo guulaha la gaaray, ayuu sheegay in ay muhiim tahay in si habboon loo adeegsado fursadaha ka jira beeraha, warshadaha wax-soo-saarka, iyo teknoolojiyada abuuri karta shaqooyin.

Wuxuu sidoo kale carrabka ku adkeeyay in si gaar ah loo hago lana xoojiyo hawlaha ogaanshaha shaqo-la’aanta, taageeridda shirkadaha jira, iyo in hay’adaha qiimeeya xirfadaha ay shaqadooda u gutaan si tayo leh.

Dhanka xasilinta suuqa, Aadan Faarax wuxuu sheegay in horumarro isdaba joog ah la arkayo, isla markaana si loo sii xoojiyo arrintan diiradda la saari doono kordhinta wax-soo-saarka iyo helitaanka badeecadaha.

Arrintan awgeed, wuxuu tilmaamay in loo baahan yahay in la ballaariyo xarumaha ganacsiga, la ilaaliyo tayada wax-soo-saarka, la taageero iskaashatooyinka, isla markaana la dardar-geliyo dhismaha xarumo ganacsi oo casri ah, tayo leh, oo ah himilo ka mid ah yoolalka xisbiga, si magaalo walba looga helo.

Gebogabadii, wuxuu sheegay in Xisbiga Barwaaqo uu si joogto ah u xoojin doono hawlihii uu ku bilaabay waaxyaha kala duwan si kor loogu qaado ka faa’iideysiga shacabka.

Wuxuu intaas ku daray in si loo gaaro natiijooyinka la doonayo ay lama huraan tahay go’aan adag oo hoggaamineed, iyadoo lagu dhisayo guulihii lixda bilood ee la soo dhaafay lagana jawaabayo caqabadaha jira iyadoo la dejinayo xalal cad.

Madasha waxaa ka qayb galay madaxda laamaha Xisbiga Barwaaqo iyo hoggaaminta garabka dhallinyarada.

#WWI 
#Wakaaladda_Wararka_Itoobiya