Itoobiya oo khibraddeeda suuqa wax-soo-saarka la wadaagaysa dalalka Afrika, waxat gudaneysaa kaalinteeda qaaradeed

Addis Ababa, Xoorreey 16/2018 (ENA): Itoobiya ayaa sheegtay inay si firfircoon ula wadaagayso dalalka Afrika khibradda ballaaran ee ay ka kasbatay nidaamka iyo hab-maamulka suuqa wax-soo-saarka, taas oo ka tarjumaysa kaalinteeda qaaradeed. 

Sida uu sheegay Agaasimaha Guud ee Suuqa Wax-soo-saarka Itoobiya, Mudane Margiya Baysa, dalka ayaa sii xoojinaya doorkiisa hoggaamineed ee qaaradda.

Mudane Margiya Baysa oo wareysi siiyay Wakaaladda Wararka Itoobiya (ENA) ayaa sheegay in hay’addu ay si joogto ah u horumarinayso nidaamka hay’adeed iyo adeegyada suuqa, si ay ula jaanqaado isbeddellada casriga ah.

Waxa uu tilmaamay in awoodda muhiimka ah ee uu Suuqa Wax-soo-saarka Itoobiya dhisay ay ka dhigtay hay’ad hormuud ah oo dalal badan oo Afrika ah ay ka qaataan khibrad iyo tusaale.

Sidoo kale, wuxuu carrabka ku adkeeyay in hay’addu ay guul weyn ka gaartay in tayada loo aqoonsado halbeegga ugu muhiimsan ee ganacsiga.

Haatan, ganacsi ayaa lagu wadaa 28 nooc oo wax-soo-saar ah iyadoo loo dejiyay shuruudo iyo heerar faahfaahsan oo lagu cabbiro tayada, ayuu sheegay.

Si loo buuxiyo baahida xirfadlayaal ee ka jirta sektarka, Akademiyadda Suuqa Wax-soo-saarka Itoobiya ayaa la aas-aasay, taas oo bixisa tababaro ballaaran, ayuu intaas ku daray.

Tababaradaas ayaa si gaar ah diiradda u saaraya dhadhaminta bunka, baaritaanka digirta iyo miraha saliidda leh, waxaana ka faa’iideysta ka-qaybgalayaal gudaha iyo dibaddaba.

Agaasimaha Guud ayaa sidoo kale sheegay in qaabka hawlgalka isku-dhafan ee uu adeegsado Suuqa Wax-soo-saarka Itoobiya uu noqday tusaale ay dalal kale ku dayanayaan.

Arrintan darteed, dalalka Tansaaniya, Angoola iyo Gaana ayaa aasaasay suuqyadooda wax-soo-saarka iyagoo ka duulaya qaabka ganacsi iyo nidaamka kormeerka tayada ee Itoobiya.

Dhawaan, khubaro ka kala yimid Tansaaniya iyo Kenya ayaa tababar ku qaatay Itoobiya, halka khubaro Itoobiyaan ahna ay u safreen dalal kala duwan si ay u bixiyaan taageero iyo tababaro, ayuu sheegay.

Ugu dambayn, wuxuu xusay in hay’addu ay ka shaqaynayso ballaarinta awoodda iyo kaabayaasha Akademiyadda si loo bixiyo adeegyo ka sii wanaagsan.

#WWI #Wakaaladda_Wararka_Itoobiya