Dhismaha nidaam dastuur ah oo shaqeeya iyo dowlad wax ku ool ah waa muhiim si loo xoojiyo nabadda, midnimada iyo horumarka Afrika— Taaye Asqasilaase

Addis Ababa, Gudba 19/2018 (ENA): Shirweynihii afraad ee caalamiga ah ee maxkamadaha dastuuriga ah ee Afrika iyo hay’adaha la midka ah ayaa ka socda Addis Ababa.

Madaxweynaha Itoobiya ayaa furitaanka shirka ka sheegay in nidaamka dastuuriga ahi aanu ku koobnayn qorista dastuurka oo keliya, balse uu muhiim u yahay ilaalinta sareynta sharciga, islaxisaabtanka, iyo dhowrista xuquuqda aasaasiga ah.

Wuxuu tilmaamay in dastuurku dhiso nidaam awoodda siyaasadeed loogu wareejiyo si masuuliyad leh, isla markaana uu furo wadiiqo lagu hirgaliyo hannaan dowladeed oo la isku halayn karo.

Madaxweynuhu wuxuu qiray in Afrika ay weli wajahayo caqabado badan oo hor istaaga kobcinta maamulka dastuuriga ah, sida afgambiyada, siyaasadda aan xasiloonayn, tabar yaraanta hay’adaha iyo damaca lagu helo awood aan waafaqsanayn dastuurka.

Wuxuu xusay in Itoobiya leedahay waayo-aragnimo gaar ah, maadaama ay soo martay nidaamyo kala duwan oo sharci iyo maamul ah, laga bilaabo Fetxa Negest ilaa xeerar casri ah, isla markaana ay yeelatay dastuur laga soo bilaabo qarnigii 20aad.

Madaxweynuhu wuxuu carrabka ku adkeeyay in Afrika laga dhiso hay’ado dowladeed oo daahfuran oo caddaalad ah si loo gaaro Afrika nabad iyo horumar leh. Wuxuu sheegay in nidaamka dastuuriga ahi leeyahay door muhiim ah, isla markaana loo baahan yahay in la xoojiyo dhaqanka caddaaladda iyo nidaamka garsoorka.

Ugu dambayn, wuxuu sheegay in si loo ilaaliyo nabadda, midnimada iyo horumarka Afrika ay lama huraan tahay in mudnaanta si gaar ah loo siiyo hirgelinta nidaamka dastuuriga ah iyo dhismaha dowlad adag oo shaqaysa.

#WWI 
#Wakaaladda_Wararka_Itoobiya