Dadaallada ururinta ajandayaasha iyo doorashada wakiillada qurbajoogta si guul leh ayaa loosoo gabagabeeyey— Komishinka Wadatashiga Qaran ee Itoobiya

Addis Ababa, Dirir 7/2018 (ENA): Komishinka Wadatashiga Qaran ee Itoobiya ayaa sheegay in uu si guul leh loo soo gebagebeeyay hawsha ururinta ajendaha iyo doorashada wakiillada ka socda qurbajoogta Itoobiya.

Komishinku wuxuu sheegay in shirar wadatashi ah lagu qabtay meelo ay ka mid yihiin Koonfur Afrika, Waqooyiga Ameerika, Kanada, Imaaraadka Carabta, Iswidhan, iyo Boqortooyada Ingiriiska, kuwaas oo ay ka qayb galeen xubno ka tirsan bulshada Itoobiya ee qurbaha ku nool.

Dadka aan awoodin in ay si toos ah uga soo qayb galaan madasha ayaa fursad loo siiyay in ay si khadka internetka ah uga qayb qaataan, sida uu sheegay komishinku. Intii lagu guda jiray kulammadaas, waxaa la qabtay doodaha ku saabsan wada fahamka, ururinta ajendaha, iyo doorashada wakiillada.

Komishinku wuxuu sheegay in uu dadaal badan ku bixiyay sidii madashu u noqon lahayd mid furan, ka-qaybgal guud iyo wadar ahaaneed, isla markaana muwaadiniinta Itoobiya iyo jiilalka ka soo jeeda dalka ay si firfircoon uga qayb qaateen, iyagoo adeegsanaya xuquuqdooda rayiga.

War-saxaafadeedka komishinka ayaa intaas ku daray in qof walba uu xaq u lahaa ka qaybgalka, xitaa kuwa aan doonayn in ay si toos ah uga soo muuqdaan madasha, ay fursad u heleen in ay fikirkooda iyo talooyinkooda soo gudbiyaan.

Ajendayaasha laga soo ururiyay bulshada qurbaha ayaa lagu dari doonaa hannaanka isku-darka ajendayaasha wadatashiga qaran, waxaana wakiillada la soo doortay lagu casuumi doonaa in ay ka qaybgalaan shirweynaha wadatashiga qaran ee la qaban doono gudaha dalka.

Komishinku wuxuu xusay in uu faa’iidooyin badan ka helay waayo-aragnimada iyo tusaalooyinka hay’adaha ka shaqeeya nabadda iyo wadahadalka bulshada, kuwaas oo noqon doona qayb muhiim ah oo lagu xoojinayo hawlaha soo socda.

Sidoo kale, komishinku wuxuu sheegay in hawlo kale ay socdaan si muwaadiniinta Itoobiya ee ku nool dalal aan weli la gaadhin ay iyaguna u soo gudbiyaan ajendahooda iyo wakiilladooda iyagoo adeegsanaya aaladaha dijitaalka ah.

Komishinku wuxuu u mahadceliyay dhammaan qurbajoogta ka qayb gashay wadatashiyada, ururrada bulshada, Wasaaradda Arrimaha Dibadda, safaaradaha iyo qunsuliyadaha Itoobiya, dawladaha dalalka martida loo ahaa, iyo hay’adaha dawliga ah iyo kuwa aan dawliga ahayn ee gacan ka geystay hirgelinta hawshan.

Dhanka kale, komishinku wuxuu sheegay in dadaallada lagu bilaabayo wadatashiga deegaanka Tigraay ay si xoog leh u socdaan, iyadoo wadahadallo laba wareeg ah hore ula yeesheen dhinacyada ay khuseyso, lagana shaqeynayo sidii loo abuuri lahaa xaalado fududeynaya bilowga rasmiga ah ee wadatashiga.

Ugu dambayn, komishinku wuxuu xaqiijiyay in uu si joogto ah u wado diyaarinta, isku dubbaridka, iyo dhamaystirka ajendayaasha laga soo ururiyay bulshada, taas oo gogol xaaraysa shirweynaha wadatashiga qaran ee la filayo in dhawaan la qabto.

#Itoobiya 
#Wakaaladda_Wararka_Itoobiya