Itiyo-Telekom ayaa soo bandhigtay adeeg cusub oo lagu magacaabo “The Nexus” si loo fududeeyo helitaanka internet-ka

Addis Ababa, Dirir 7/2018 (ENA):  Shirkadda Itiyo-Telekom ayaa si rasmi ah u daahfurtay adeeg cusub oo lagu magacaabo “The Nexus”, kaas oo lagu sheegay inuu fududeynayo helitaanka adeegga internet-ka ee dalka.

Maareeyaha guud ee Itiyo-Telekom, Frehiwot Taamru, ayaa sheegtay in shirkaddu hadda leedahay 85.9 milyan oo macaamiil, balse kaliya 47 milyan oo ka mid ahi ay isticmaalaan internet-ka.

Waxay tilmaantay in inkastoo ay jiraan sababo kala duwan oo tan keenaysa, haddana midka ugu weyn uu yahay qiimaha sarreeya ee qalabka la adeegsado, sida taleefannada casriga ah iyo kombiyuutarrada.

 

Si arrintan loo xalliyo, Itiyo-Telekom ayaa soo saartay adeeggan “The Nexus,” kaas oo dadka u suurtagelinaya inay helaan qalab casri ah sida telefoonnada smart-ka ah, laptops, tablets, iyo kombiyuutarada miiska (desktop) oo lagu iibinayo qiimo jaban.

Macaamiisha adeeggan isticmaasha ayaa awoodi doona inay si toos ah ugu xirmaan adeegga cloud ee Itiyo-Telekom, taas oo u sahlaysa inay helaan internet tayo leh.

Waxaa intaas dheer in shirkaddu sheegtay in adeeggan uu door muhiim ah ka ciyaari doono kobcinta adeegyada dijitaalka ah ee dalka, gaar ahaan kuwa ku saabsan beeraha, maaliyadda dijitaalka ah, waxbarashada iyo adeegyada dowladda, kuwaas oo si isa soo taraysa ugu wareegaya internet-ka.

#Itoobiya 
#Wakaaladda_Wararka_Itoobiya