Carruurta gaartay da’da waxbarashada ee aan la geyn dugsiga waa mid la iskula xisaabtamayo— Wasaaradda Waxbarashada

Addis Ababa, Kodxin/Maskaram 2/2017 (ENA):  Wasaaradda Waxbarashada ayaa xusuusisay waalidiinta iyo masuuliyiinta carruurta in waxbarashada hoose ee aasaasiga ah ay tahay mid lacag la’aan ah, sidaas darteedna carruurta gaartay da’da waxbarashada lagama maarmaan tahay in la geeyo dugsiga.

Waxaa lagu sheegay in in ka badan 7 milyan oo carruur ah oo ku nool Itoobiya, inkasta oo ay gaareen da’da waxbarashada, haddana sababo kala duwan dartood aysan weli helin fursad waxbarasho. Wasaaraddu waxay sheegtay in arrintan looga baahan yahay dhaqdhaqaaq qaran oo lagu daro dhammaan bulshada si carruurtaasi loogu helo dugsiyo, waana waajibaad muwaadinimo.

Dhaawiit Asene, madaxa waaxda horumarinta manhajka iyo barnaamijyada waxbarashada ee Wasaaradda, ayaa u sheegay ENA in kaliya 60% carruurta laga bilaabo fasalka ka hor dugsiga ilaa fasalka 8aad ay helaan fursad waxbarasho. Wuxuu xusuusiyay in sharciyada waxbarashadu si cad u dhigayaan in waxbarashada hoose ay tahay qasab, carruurtana aan la geyn dugsiga uu waalidka ku muteysan karo la xisaabtan sharci.

Wuxuu ku booriyay waalidiinta, masuuliyiinta, bulshada iyo daneeyayaasha kale inay ka shaqeeyaan sidii aan carruurta gaartay da’da waxbarashada looga tagi lahayn meel ka baxsan dugsiga.

Sannadkii 2017, in ka badan 7 milyan oo carruur ah ayaa ka maqnaa dugsiyada sababo ay ka mid yihiin colaadaha, saboolnimada, iyo adeegsiga xooggooda. Sannadkii 2018, waxaa qorshaysan in 31.9 milyan oo arday la geeyo fasallada laga bilaabo ka hor dugsiga ilaa fasalka 12aad, kuwaas oo 15 milyan ka mid ahi yihiin gabdho.

Si qorshahan loo fuliyo, Wasaaraddu waxay diyaarisay dukumeenti ku wajahan saddex qodob oo waaweyn, isla markaana lala shaqeynayo dowladd deegaannada iyo daneeyayaasha kale. Qodobadaas waxaa ka mid ah: 1. Wacyigelin bulshada iyo daneeyayaasha si carruurta loo geeyo dugsiga.

2. Abuurista xaalado fududeynaya ka qeybgalka ardayda, oo ay ku jiraan toddobaadyada diiwaangelinta, nadaafadda dugsiyada, olole guri-guri, iyo ururinta qalabka waxbarashada.

3. Ka shaqeynta sugidda nabadda meelaha colaadaha ka jiraan iyadoo lala kaashanayo bulshada deegaanka, culimada, odayaasha dhaqanka, iyo dadka saameynta leh si dugsiyada loogu dhigo jawi ku habboon waxbarashada.

Waxaa la xaqiijiyay in tan iyo 1da Naaf/Nahaase 2017, diiwaangelinta ardayda iyo hawlaha la xiriira ay si wanaagsan uga socdaan dalka oo dhan. Dugsiyaduna waxay si rasmi ah u bilaabi doonaan casharrada 5ta Kodxin/Maskaram 2018.

#Itoobiya
#Wakaaladda_Wararka_Itoobiya