Heshiiska weyn ee dhismaha Warshadda Bacriminta Itoobiya ayaa loo arko guul taariikhi ah oo beeraha dalka ah

Addis Ababa, Naaf/Nahaase 23/2017 (ENA):  Waxaa heshiis taariikhi ah kala saxiixday Maamulka Maalgashiga Itoobiya iyo Kooxda Dangote, kaas oo lagu dhisayo Warshad Bacriminta. Mashruucan ayaa loo arkaa mid wax weyn ka tari doona horumarinta beeraha dalka, waxaana lagu tilmaamay inuu yahay "guul wax-soo-saar iyo horumar dhaqaale horseedi kara."

Mashruucan oo qiimihiisu lagu sheegay 2.5 bilyan oo doolar, ayaa la filayaa in uu soo saaro ilaa 3 milyan oo metric ton oo bacrimin ah sanadkiiba, taas oo Itoobiya ka dhigi doonta mid ka mid ah dalalka ugu sarreeya soo saarista bacriminta ee adduunka.

Sida uu sheegay Dhastaa Fiqaadhu, khabiir sare oo ka tirsan Hay’adda Cilmi-baarista Beeraha Itoobiya (EIAR), dhismaha warshaddan wuxuu si toos ah uga jawaabayaa baahida degdegga ah ee bacriminta ee beeralayda. Wuxuu sheegay in hadda ku dhawaad 40% beeralayda Itoobiya ay isticmaalaan bacrimin, balse heerka isticmaalka dalka uu aad uga hooseeyo celceliska caalamiga ah.

Inkasta oo beeralayda caalamka ay isticmaalaan celcelis ahaan 146 kiiloogaraam halkii hektar, beeralayda Itoobiya waxay isticmaalaan qiyaastii 35 kiiloogaraam halkii hektar, taas oo ka dhigaysa mid aad u hooseysa. Sidaa darteed, warshaddan bacriminta ayaa loo arkaa mid wax ka tari doonta sare u qaadista wax-soo-saarka iyo wax-ku-oolnimada beeraha.

Dhastaa wuxuu intaa ku daray in mashruucan uu si weyn uga caawin doono Itoobiya: in la yareeyo kharashka culus ee ku baxa soo dejinta bacriminta dibadda, in la xoojiyo awoodda dalka ee wax-soo-saar gudaha ah, in la taageero beeralayda dalka, gaar ahaan kuwa ku tiirsan dalagga waaweyn.

Waxaa kale oo uu xusay in warshaddan ay qayb muhiim ah ka tahay istiraatiijiyadda dowladda ee ah in la kordhiyo badbaadada cuntada, lana horumariyo wax-soo-saarka beeraha si looga jawaabo caqabadaha sida dhulka liita, abaaraha iyo isbeddelka cimilada.

Mashruucan ayaa sidoo kale lala xiriiriyey ballan-qaadkii Midowga Afrika ee Bayaanka Abuuja, kaas oo qorshihiisu ahaa in isticmaalka bacriminta la gaarsiiyo ugu yaraan 50 kiiloogaraam halkii hektar sanadka 2024, inkastoo hadafkaas ilaa iyo hadda aan la gaarin.

Warshaddan bacriminta ee laga dhisayo Itoobiya ayaa loo arkaa mid kaalin muuqata ka qaadan doonta isbeddelka beeraha dalka iyo xaqiijinta badbaadada cuntada qaranka, iyadoo sidoo kale dhimi doonta ku-tiirsanaanta bacriminta laga keeno dibadda.

#WarshaddaBacriminta #Itoobiya #MaamulkaMaalgashiga #WarshadahaDangote #BadbaadadaCuntada #IsbeddelkaBeeraha #RWAbiyAhmed
#Itoobiya 
#Wakaaladda_Wararka_Itoobiya