Biyo-xidheenka weyn ee Itoobiya ayaa noqday astaan mideyn, horumar iyo dalxiis

Shacabka Itoobiya, iyagoo aan waxba reeban ayay dhiiggooda, dhididkooda iyo tabartooda, ayaa si geesinnimo leh ay u dhiseen Biyo-xidheenka Weyn. Inkasta oo dad badan oo aan awood dhaqaale badan haysan aysan bixin karin lacag badan, haddana waxa ay bixiyeen wixii ay haysteen si mashruucu u hirgalo. Taasi waxa ay marag madoonta ka dhigeysaa kalgacalka iyo daacadnimada shacabka ee dalkooda iyo mustaqbalkiisa.

Biyo-xidheenkan oo loo dhisay in uu soo saaro tamar koronto ayaa ka baxsan ujeeddadaas koowaad faa’iidooyin badan u leh qaranka. Waxaa ka mid ah inuu noqday xarun mideysay shacabka oo dhan, sidii xilligii guushii Adhwa oo kale, iyada oo dadku ay ka kala  yimideen afarta geesood ee dalka si ay ugu midoobaan hal ujeeddo. Biya-xidheenka waxa uu noqday astaan muujinaysa awoodda midnimada, adkeysiga iyo mas’uuliyadda wadajirka ah ee muwaadiniinta.

Waxaa kale oo uu biyo-xidheenku leeyahay faa’iido dhaqaale oo aan la soo koobi karin. Marka laga soo tago tamarta korontada, waxa uu noqday goob weyn oo dalxiis ah. Wasiiru Dowlaha Dalxiiska, Dr. Endegena Abebe, ayaa sheegay in mashruucu uu noqon doono mid ka mid ah meelaha ugu xiisaha badan ee dalxiisayaasha soo jiita, isla markaana dhaqaalaha dalka ku kordhiya fursado shaqo abuur, hoteello, jasiirado dalxiis, xeebaha harada iyo adeegyo kale oo soo jiidasho leh. Waxa uu carrabka ku adkeeyay in taariikhda mashruucan, sida uu ku hirgalay dhiigga, dhididka iyo wadajirka shacabka, loo baahan yahay in si habaysan loogu soo bandhigo dalxiiaayaasha.

Dowladda federaalka, dowlad deegaanka Benishangul Gumus, Wasaaradda Dalxiiska iyo hay’adaha maalgashiga ayaa horey u bilaabay qorshayaal lagu dhisayo adeegyo aasaasi ah oo mustaqbal fog ah. Kuwaas waxaa ka mid ah jidad isku xira deegaanka, hoy dalxiiseed, xarumo iyo goobaha lagu nasto. Ujeeddadu waa in bulshada deegaanka iyo qaranka oo dhan ay si dhab ah uga faa’iideystaan biyo-xidheenka. Waxaa la sheegay in daraasado lagu ogaanayo sida ugu wanaagsan ee loo horumarin karo goobta ay socdaan, isla markaana la qorsheynayo in la sameeyo barnaamijyo lagu soo bandhigo dhaqanka deegaanka iyo taariikhda mashruuca.

Harada biyo-xidheenka iyo jasiiradaha hareeraha ku yaalla ayaa lagu tilmaamay inay noqon doonaan meelaha ugu muhiimsan ee lagu sameeyo dalxiis, kalluumaysi, iyo doonyo-socod. Waxaa sidoo kale la qorsheynayaa in goobtan loo sameeyo astaan dalxiis iyo sumcad gaar ah oo u gaar ah, taas oo dalka u keenaysa dakhli iyo sumcad caalami ah.

Mashruucan waxa uu sii muujinayaa sida Itoobiya ay u leedahay hantiyo dabiici iyo taariikhi ah oo haddii si wanaagsan loo maareeyo wax weyn ku kordhin kara dhaqaalaha qaranka. Biya-xidheenka waxa uu noqday dhaxal qaran oo ay shacabka Itoobiya ku faani karaan, waxaana laga filayaa inuu isku beddelo goob soo jiidata kumannaan dalxiiseyaal oo gudaha iyo dibadda ah sannad kasta.

Haddaba, Biyo-xidheenka weyn ee Itoobiya ma aha oo keliya isha ugu weyn ee korontada iyo tamarta dalka, balse waa astaan mideysa shacabka, goob dalxiis oo weyn, iyo xudunta kobaca dhaqaalaha mustaqbalka ee Itoobiya.

#Itoobiya 
#Wakaaladda_Wararka_Itoobiya