Ra’iisul Wasaare Abiy (Dr) Aragtidiisa iyo Jacaylka uu u qabo Shacabka Itoobiya waa mid la yaab leh – Aliko Dangote

Addis Ababa, Naaf/Nahaase 22/2017 (ENA): Aasaasaha iyo Maamulaha Guud ee Dangote Group, Aliko Dangote, ayaa sheegay in jacaylka iyo aragtida uu Ra’iisul Wasaare Abiy Axmed (Dr) u hayo shacabka Itoobiya ay runtii tahay mid cajiib ah oo dhiirrigelin leh.

Dangote, oo hore uga maalgeliyey Itoobiya dhanka soo saarista sibidhka, ayaa maanta heshiis cusub kula saxiixday dowladda Itoobiya, kaas oo u saamaxaya inuu maalgelin ku sameeyo dhismaha warshad bacriminta carada.

Heshiiskan oo dalka u saamaxaya inuu sanad walba soo saaro 3 milyan oo tan oo bacriminta ciidda ah, ayuu Dangote ku tilmaamay guul weyn oo Itoobiya gaartay, taas oo wax badan ka tari doonta horumarinta beeraha.

Waxa uu intaas ku daray in Itoobiya ay tahay dal ku habboon maalgelinta, isla markaana leh dhammaan agabka iyo kaabayaal loo baahan yahay si maalgashi guuleysta loo sameeyo.

Dangote ayaa tilmaamay in bacriminta gudaha lagu soo saaro ay wax weyn ka tari doonto taageerada beeraha dalka, isagoo ku nuuxnuuxsaday in xitaa heer qaaradeed ay jiraan dalal badan oo aan wali ku guuleysan inay yeeshaan awooddaas wax-soo-saar.

Wuxuu xusay in dadaalka joogtada ah ee Ra’iisul Wasaare Abiy uu horseeday heshiiskan, kaas oo wax weyn ka yarayn doona culaysyada iyo kharashaadka ay keento bacriminta dibadda laga soo dhoofsado, sida kharashka lacagta, waqtiga, gaadiidka iyo qaybinta.

Dangote ayaa qirtay in maalgelinta bacrimintu aysan sahlanayn, isla markaana ay u baahan tahay maalgelin culus iyo dadaal joogto ah, balse heshiiskan uu yahay tallaabo muhiim ah oo Itoobiya u qaadday dhanka bacriminta gudaha.

Waxa uu farriin hambalyo ah u diray Ra’iisul Wasaare Abiy iyo shacabka Itoobiya, isagoo ku sheegay in bilowga soo saarista bacriminta gudaha ay tahay talaabo istiraatiiji ah oo farxad u ah qaranka.

Isagoo hadalkiisa soo gunaanaday, ayuu sheegay in shirkaddiisu ay leedahay khibrad iyo aqoon ku filan oo ay ku fulin karto mashruucan culus, isla markaana ay diyaar u yihiin inay si buuxda ugu adeegaan Itoobiya marka uu mashruucu bilaabmo.

#Itoobiya  #Wakaaladda_Wararka_Itoobiya