Tartanka Jaamacadaha waa inay ku salaysnaadaan tayada Waxbarashada – Brof. Birhaanu Nagaa

Addis Ababa, Afagaal/Hamle 30/2017 (ENA): Wasiirka Waxbarashada Brof. Birhaanu Nagaa ayaa sheegay in tartanka u dhexeeya jaamacadaha uu waajib ku yahay inuu ku salaysnaado tayada waxbarashada, halkii uu ka ahaan lahaa tiro dhismayaal ama qalab waxbarasho.

Kulan socday laba maalmood oo lagu qabtay Jaamacadda Goondhar oo ciwaankiisu ahaa “Waxbarashada Sare oo Saameyn Sare leh” ayaa lagu soo gabagabeeyay shirkii Golaha Isuduwidda Isbeddelka Hay’adaha Waxbarashada Sare ee Itoobiya.

Kulankaas waxaa lagu gaaray heshiis ku saabsan isbeddelka socda ee nidaamka waxbarashada, iyadoo laga arrinsaday sidii si wadajir ah looga shaqayn lahaa.

Intii lagu jiray madashii xiritaanka, Wasiirka Waxbarashada Brof. Birhaanu Nagaa oo hadal ka jeediyay ayaa sheegay in jaamacaduhu ay tahay in tartankoodu noqdo mid ku salaysan tayada waxbarashada, halkii uu ka ahaan lahaa tirada qalabka ama dhismayaasha ay haystaan.

Wuxuu carabka ku dhuftay muhiimadda ay leedahay in la wadaago fikradaha u dhexeeya jaamacadaha, isla markaana la fahmo si dhab ah ujeeddada ugu dambeysa ee isbeddelka waxbarasho.

Wuxuu sidoo kale su’aalo muhiim ah ka keenay: Noocee arday ah ayay soo saarayaan jaamacaduhu? Cilmi-baaristooda ma tahay mid waqtiyeysan oo muhiim ah? Ma la jaanqaadaysaa xaaladda caalamka? Wuxuu sheegay in su’aalahan lagu salayn doono qiimeynta waxqabadka jaamacadaha.

Brof. Birhaanu Nagaa wuxuu intaas ku daray in nidaamyada liita ee la xiriira hirgelinta mashaariicda iyo habka imtixaanka dhamaadka waxbarashada ay u baahan yihiin dib-u-habayn.

Ugu dambeyntiina, wuxuu sheegay in saddexdii sano ee la soo dhaafay, in kasta oo la weydiiyay jaamacadaha inay keenaan xog sax ah oo dhab ah, aysan si buuxda u gudan waajibkooda, taasoo keeni doonta in sannadka soo socda lala xisaabtamo.

#Itoobiya 
#Wakaaladda_Wararka_Itoobiya