Raadka Cagaaran waa qayb ka mid ah ololayaasha taariikhiga ah ee Itoobiya" – Ra’iisul Wasaare Abiy Axmed (Dr.)

Addis Ababa, Afagaal/Hamle 24/2017 (ENA):  Ra’iisul Wasaaraha Itoobiya, Dr. Abiy Axmed, ayaa sheegay in ololaha cagaarinta dalka uu yahay mid taariikhi ah oo waqti dheer lagu xusuusan doono.

Dr. Abiy ayaa hadalkan ka jeediyey maanta oo uu si rasmi ah uga bilaabay magaalada Jimma ololaha lagu beeri doono 700 milyan oo geed hal maalin gudaheed.

Isagoo la hadlayey shacabka ayaa Ra’iisul Wasaaruhu sheegay in beerista 700 milyan oo geed ay tahay hawl aad u weyn, islamarkaana ay noqonayso ololaha hal maalin ugu ballaaran ee abid dunida ka hirgala.

Wuxuu sidoo kale xusay in qorshahan sanadkan loogu talagalay in lagu beero 8 bilyan oo geed, ayna diyaar u yihiin in ka badan tiradaas geedaha. Waxa uu tilmaamay in tan iyo markii ololaha cagaarinta la bilaabay, la beerey in ka badan 48 bilyan oo geed.

Ra’iisul Wasaaruhu waxa uu yiri: “Haddii sanadkan qorshuhu guuleysto, waxay fursad noo siineysaa inaan dhowaan gaadhno yoolka beerista 50 bilyan oo geed, taas oo markaas noqon doonta guul la taaban karo.”

 

Wuxuu ku nuux-nuuxsaday in ololaha cagaarinta uu Itoobiya galiyey waddo cusub oo horumarineed, uuna muujinayo sida shacabka Itoobiya ay isu abaabuli karaan oo ay uga shaqeyn karaan mustaqbalka dalkooda.

Ra’iisul Wasaaraha ayaa sheegay in shacabka malaayiinta gaaraya ee si is-xilqaan ah uga qayb qaadanaya beerista geedaha ay muujinayaan sida ay uga go’an tahay in ay hirgeliyaan riyada wadajirka ah ee qarankooda.

“Ololaha Raadka Cagaaran wuxuu noqonayaa sida mashruuca weyn ee Biya-xireenka Biyaha ee Itoobiya  – oo kale, waana olole taariikhi ah,” ayuu yiri Dr. Abiy.

Wuxuu intaa ku daray in ololahani uu kaalin weyn ka qaadanayo yareynta saboolnimada dalka iyo kor u qaadidda wax-soo-saarka cuntada. Wuxuuna ugu dambayn ugu baaqay shacabka Itoobiya in ay si mideysan, dadaal iyo feejignaan leh uga shaqeeyaan daryeelka deegaanka iyo horumarinta wax-soo-saarka dalka.

Ra’iisul Wasaaraha ayaa ugu dambayn mar kale ka codsaday dhammaan shacabka in ay si buuxda uga qayb qaataan ololaha maanta socda ee beerista geedaha.

#OlolahaRaadkaCagaaran
#Itoobiya 
#Wakaaladda_Wararka_Itoobiya