Maanta waa maalin ay Itoobiyaanku qorqyaan taariikh cusub oo midnimo iyo dadaal Qaran ah

Addis Ababa, Afagaal/Hamle 24/2017 (ENA): Adeegga Xidhiidhka Dawladda  ayaa sheegay in maanta ay tahay maalin taariikhi ah oo Itoobiyaanku ay midnimo ku muujinayaan si ay u bilaabaan olole dhir-beerid ballaaran oo qaran ah.

Wasiiru Dowlaha Adeegga Xidhiidhka Dawladda  Tasfaahun Gobesaay, ayaa sheegay in maanta si rasmi ah loo bilaabay ololaha lagu beeri doono 700 milyan oo geed hal maalin gudaheed, isagoo tilmaamay in maalintan ay astaan u tahay awoodda iyo kartida shacabka Itoobiya.

Wasiirku wuxuu sheegay in maanta, bisha Afagaal/Hamle 24, 2017, ay noqotay maalin Itoobiyaanku ay kaligood go'aan ku gaareen ayna ku hirgelinayaan mashruuc weyn oo lagu beero 700 milyan oo geed oo lagu xoojinayo cagaarinta dalka.

Waxaa kale oo uu xusay in lixdii sano ee lasoo dhaafay Itoobiya ay beertay in ka badan 40 bilyan oo geed, taasoo dalka ka dhigtay tusaale heer caalami ah oo ku saabsan ilaalinta deegaanka. Waxaana shacabka Itoobiya si buuxda u taageereen baaqii Ra’iisul Wasaare Abiy Axmed uu hore ugu diray.

Wasiiru Dowluhu wuxuu shacabka u diray hambalyo isagoo sheegay in maanta ay tahay maalin ay Itoobiyaanku midnimo ku muujinayaan isla markaana ay taariikh cusub qori doonaan xilliga cagaarinta dalka. Waxa kale oo uu sheegay in sannadkan lagu talo jiro in la beero 7.5 bilyan oo geed oo isugu jira kuwa kaymaha, khudradda iyo miro kala duwan.

Wuxuu sidoo kale xusay in sannadkii hore la beertay 617 milyan oo geed hal maalin gudaheed taasoo ka badan tirada la qabtay hore, waxaana la filayaa in sannadkan la jabiyo rikoodhkaasi hore.

Wasiiru Dowluhu wuxuu sheegay in ololehan ay ka qayb qaadanayaan dhammaan qeybaha bulshada – laga bilaabo carruur ilaa waayeel, shaqaalaha dowladda, xirfadlayaal, ciidamada qalabka sida iyo dhammaan dadweynaha dalka ku sugan.

Ugu dambeyn, wuxuu carabka ku adkeeyay in beerida geedaha ay tahay mid lagula dagaallamayo nabaad guurka dhulka, lagu xaqiijinayo sugnaanta cuntada, isla markaana la doonayo in Itoobiya looga dhigo dal cagaaran.

#Itoobiya 
#Wakaaladda_Wararka_Itoobiya