Xeerka hal-abuurka bilowga ah wuxuu fududeynayaa in fikradaha muwaadiniinta loo beddelo natiijooyin wax-ku-ool ah – Dr. Belete Molla

Addis Ababa, Afagaal/Hamle 12/2017 (ENA): Wasiirka Hal-abuurka iyo Tiknoolojiyadda ee Itoobiya, Dr. Belete Molla, ayaa sheegay in xeerka hal-abuurka bilowga ah uu yahay mid muhiim ah oo suurtagelinaya in fikradaha hal-abuurka ee muwaadiniinta loo beddelo natiijooyin la taaban karo.

Wasiirku wuxuu hadalkan ka sheegay warbixin uu siiyey wakaaladda wararka Itoobiya ee ENA kadib markii Golaha Wakiillada Shacabka uu Khamiistii ansixiyay xeerka hal-abuurka bilowga ah intii lagu jiray fadhigiisii labaad ee degdegga ahaa.

Isagoo sharaxaad ka bixinaya muhiimadda xeerkan, Wasiir Belete Molla wuxuu sheegay in Itoobiya ay si adag uga shaqaynayso dhisidda dhaqaale ku dhisan hal-abuur iyo farsamooyin kala duwan, islamarkaana guulo la taaban karo laga diiwaangeliyay.

Wuxuu tilmaamay in xeerka loo diyaariyay si uu u noqdo saldhig u ah sidii fikradaha hal-abuurka loogu beddeli lahaa awood dhaqaale oo wax-ku-ool ah, sida ay uga yihiin qeybaha kale ee horumarka.

Sidoo kale, xeerkan wuxuu gundhig u noqonayaa dhismaha dhaqaalaha dhijitaalka ah iyada oo la abuurayo nidaam ku habboon kobcinta dhaqanka hal-abuurka bilowga ah ee dalka.

Wasiirku wuxuu intaas ku daray in xeerku uu dhiirigelinayo dhalinyarada Itoobiyaanka ah si ay u muujiyaan kartidooda hal-abuurka ayna ugu biiraan horumarka qaranka.

Xeerkan ayaa lagu saleeyay abuuridda jawi habboon oo kor u qaadaya dhaqanka hal-abuurka bilowga ah si loo xoojiyo fikradaha hal-abuurka leh, loona beddelo shirkado waaweyn oo tiknoolajiyadeed.

Waxaa kale oo uu wasiirku sheegay in xeerku uu dhalinyarada ka caawinayo inay ka faa’iidaystaan fursadaha jira iyaga oo ka adkaanaya caqabadaha horyaalla.

Wuxuu xusay in xeerku abuurayo jawi suurtagelinaya in fikradaha muwaadiniinta si toos ah loogu beddelo natiijooyin wax-ku-ool ah oo la taaban karo.

Dr. Belete Molla wuxuu sidoo kale sheegay in xeerkan uu Itoobiya ka caawin doono in ay ka mid noqoto dalalka hormuudka ka ah dhaqanka hal-abuurka bilowga ah caalamka, isagoo xusay in xeerku fursad siinayo abuuridda shirkado tiknoolajiyadeed oo waaweyn.

Ugu dambeyn, wuxuu sheegay in xeerkan uu wax badan ku soo kordhinayo dalka, islamarkaana si taxadar leh loo hirgelin doono si looga gaaro natiijooyin muuqda.

#Itoobiya 
#Wakaaladda_Wararka_Itoobiya