Si nabad loo helo – Maalqabeennadu waa inay joojiyaan maalgelinta kooxaha hubeysan — Ra’iisul Wasaare Abiy (Dr.)

Addis Ababa, Agaali/Sane 4/2017 (ENA): Ra’iisul Wasaaraha Itoobiya Dr. Abiy Axmed ayaa xusay in maalqabeennada doonaya in nabad lagu soo dabaalo dalka ay tahay inay joojiyaan taageerada maaliyadeed ee ay siiyaan kooxaha hubeysan ee ku sugan kaymaha.

Ra’iisul Wasaaruhu waxa uu hadalkan ka sheegay kulan uu la yeeshay wakiillo ka socday ganacsatada oo ka kala yimid guud ahaan dalka, isagoo mar kale caddeeyay in dawladdu diyaar u tahay wada-hadal nabadeed.

Waxa uu sheegay in 60 boqolkiiba caqabadaha nabadda Itoobiya ay sabab u yihiin taageerada ay kooxaha hubeysan ka helaan maalqabeennada gudaha, taasoo uu ku tilmaamay wax aan la aqbali karin in la taageero kooxaha xagjirka ah ee kasoo horjeeda nabadda isla markaana la filayo in dawladdu nabad keento.

Haddii maalqabeennadu si dhab ah u rabaan nabad, waa inay joojiyaan taageerada ay siiyaan kooxaha hubeysan ee ku sugan kaymaha, isla markaana ay ku dhiirrigeliyaan in nabad lagu soo laabto, ayuu yiri Ra’iisul Wasaaruhu.

 

“Ciddii nabad rabta annaguna diyaar baan nahay,” ayuu yiri Ra’iisul Wasaaruhu, isagoo xusay in dawladdu diyaar u tahay inay wada hadal la furto cid kasta oo nabad doonaysa.

Sidoo kale waxa uu carabka ku dhuftay in ilaalinta sharcigu ay tahay waajibaadka dowladda, isla markaana ciddii lagu helo inay sharci jebis ku kacday ay mutaysan doonto ciqaab. Waxa uu intaa ku daray in nabaddu ay tahay arrin aad muhiim u ah oo loo baahan yahay in si wadajir ah loo guto.

Ra’iisul Wasaaruhu waxa uu qiray in su’aalaha ku saabsan nabadda ay yihiin kuwo sax ah, balse waxa uu sheegay in aanay habboonayn in arrimaha nabadda lagu eego sidii inay dowladdu keli ku tahay, iyadoo ay jiraan kooxo kale oo aan xilkooda gudanaynin.

Dhanka kale, waxa uu sheegay in ay jiraan eedeymo ku saabsan in qaar ka mid ah ganacsatada lacago lagaga qaado keelaayada lagu xakameeyo ka hortagga ganacsiga sharcidaradda ah iyo hubka sharci darrada ah.

Ra’iisul Wasaaruhu isagoo arrintaasi ka hadlayay, waxa uu sheegay in haddii aan la helin kormeerro dhab ah, ay suurtagal tahay in hub sharci darro ah uu dalka soo galo, taasina ay khatar ku tahay nolosha shacabka.

Si kastaba ha ahaatee, waxa uu ballanqaaday in dowladda ay si wadajir ah ula shaqayn doonto ganacsatada si loo helo hannaan hubin ah oo aanay la socon lacag dalab.

#Itoobiya 
#Wakaaladda_Wararka_Itoobiya