ኢንስቲትዩት ጥዕና ሕብረተሰብ ኢትዮጵያ ኣብ ዝሓለፉ 100 ዓመታት ኣብ ሓለዋ ጥዕና ዜጋታት ዕውትን ዘመን ዘይስዕሮን ኣሰር ኣንቢሩ እዩ

ኣዲስ ኣበባ፤ ሓምለ 9/2018 (ኢዜኣ)፦ ኢንስቲትዩት ጥዕና ሕብረተሰብ ኢትዮጵያ ኣብ ዝሓለፉ 100 ዓመታት ኣብ ሓለዋ ጥዕና ዜጋታት ዕውትን ዘመን ዘይስዕሮን ኣሰር መፅናዕትን ምርምርን ከምዘንበረ ዋና ዳይሬክተር እቲ ኢንስቲትዩት ዶክተር መሳይ ሃይሉ ገሊፆም።

እቲ ኢንስቲትዩት መበል 100 ዓመት በዓል ምስረታኡ ካብ ሎሚ 9 ሓምለ 2018 ዓ.ም ጀሚሩ ንሰለስተ ተኸታተልቲ መዓልታት ብዝተፈላለዩ መደባት ከኽብሮ እዩ።

ኢንስቲትዩት ጥዕና ሕብረተሰብ ኢትዮጵያ መበል 100 ዓመት በዓል ምስረታኡ ፕሬዝዳንት ፌዴሬኢ ኣምባሳደር ታዬ አፅቀ ስላሴ ኣብ ዝተረኸቡሉ ብድሙቕ ኩነታት ይኽበር ኣሎ።

ኣብቲ በዓል ኣብ ቤት ምኽሪ ወከልቲ ህዝቢ ምክትል ኣካቢ ቀዋሚ ኮሚቴ ጉዳያት ጥዕና፣ ማሕበራዊ ልምዓት፣ ባህልን ስፖርትን ታደለ ቡራቃ (ዶ/ር) ፣ ሚኒስትር ጥዕና ዶክተር መቅደስ ዳባን ሓዊሱ ተወከልቲ ኣህጉራውያንን ዓለምለኻውያንን ትካላት ተረኺቦም እዮም።

ዋና ዳይሬክተር እቲ ኢንስቲትዩት ዶክተር መሳይ ሃይሉ ኣብዚ እዋን ከምዝበልዎ፤ እቲ ኢንስቲትዩት ኣብ ዝሓለፉ 100 ዓመታት ኣብ ዓውዲ ጥዕናን ድሕንነትን ሕብረተሰብ ዕውታት ስራሕቲ ሳይንሳዊ መፅናዕትን ምርምርን ብምክያድ፣ ዘመን ዘይስዕሮ ታሪኻዊ ኣሰር ኣንቢሩ እዩ።

እቲ ኢንስቲትዩት ስግኣታት ጥዕና ሕብረተሰብ ኣቐዲሙ ብምፍላይን ምርምር ብምክያድን፣ ዝተፈላለዩ ክታበታት ብምፍራይን ከምኡ እውን ንዘጋጥሙ ሓደጋታት ጥዕና ቅልጡፍ ምላሽ ኣብ ምሃብ ዕውት ኮይኑ ከምዝፀንሐ ገሊፆም።

ኣብ ቀረፃ ሃገራዊ ፖሊሲን ስትራቴጂን ሳይንሳዊ ውጽኢታት መፅናዕቲ ከም ግብኣት ብምቕራብ፣ ንዘጋጥሙ ለበዳታት ኣቐዲምካ ብምፍላጥ፣ ብምክልኻልን ብምቁፅፃርን ዝለዓለ እጃም ከምዘበርከተ ተዛሪቦም።

ብተወሳኺ እውን ዓለምለኻዊ ደረጃኡ ዝሓለወን ፅሬት ዘለዎን ስርዓት ምርመራ ላቦራቶሪ ብምዝርጋሕ ከምኡ እውን ዓቕሚ ሰብ ሞያ ኣብ ምህናፅ ዕውታት ንጥፈታት ከምዝፈፀመ ኣልዒሎም።

ኣብዚ እዋን እውን ሰብ ስራሕ ብልሒ ብምጥቃም ለበዳታትት ኣቐዲምካ ምትባይ ምኽእልን  ምዕባይ ምዝማን ዋሕዚ ሓበሬታን ይስራሕ ከምዘሎ ገሊፆም።