ሃገራዊ ምኽክር ንህንፀት ጠንካራ ሃገረ መንግስቲ መሰረት እዩ 

ኣዲስ ኣበባ/ጥሪ 7/2018(ኢዜኣ) ሃገራዊ ምኽክር ዘላቒ ሰላም ንምርግጋፅን ንህንፀት ጠንካራ ሃገረ መንግስትን መሰረት ከምዝኾነ ኣብ ቤት ምኽሪ ወከልቲ ህዝቢ ምክትል ኣካቢ ቀዋሚ ኮሚቴ ጉዳያት ዲሞክራሲ ኣዝመራው ኣንደሞ ገሊጾም።
ብምትሕብባር ናይ ኢትዮጵያ ዜና ኣገልግሎትን ቢሮ ኮሙኒኬሽን ብሄራዊ ክልላዊ መንግሥቲ ክልል ኣምሓራን ዝተዳለወ ዘተ ፓነል "ሰላም ምፅናዕ፤ ፀጋ ንምልማዕ" ኣብ ትሕቲ ዝብል መሪሕ ሓሳብ ኣብ ከተማ ባህር ዳር ይካየድ ኣሎ። 
ኣብቲ መድረኽ፤ ርእሰ ምምሕዳር ብሄራዊ ክልላዊ መንግሥቲ ክልል ኣምሓራ ኣረጋ ከበደን፣ ኣካቢ ቀዋሚ ኮሚቴ ጉዳያት ዲሞክራሲ ቤት ምኽሪ ወከልቲ ህዝቢ እውነቴ ኣለነ፣ዋና ፈፃሚ ስራሕ ናይ ኢትዮጵያ ዜና ኣገልግሎት ሰይፈ ደርቤን ፃውዒት ዝተገበረሎም ኣጋይሽን ተረኺቦም።

ኣብ ቤት ምኽሪ ወከልቲ ህዝቢ ምክትል ኣካቢ ቀዋሚ ኮሚቴ ጉዳያት ዲሞክራሲ ኣዝመራው ኣንደሞ “ሃገራዊ ምኽክርን ህንፀት ሰላምን” ብዝብል ርእሲ መዛተዪ ፅሑፍ ኣቕሪቦም።
ኣብ ፅሑፎም እውን፤ ኣብ ኢትዮጵያ ኣፈላላያት ብሰላማዊ መንገዲ ንምፍታሕን ዘላቒ ሰላም ንምርግጋፅን እጃም ሃገራዊ ምኽክር ዝለዓለ እዩ ኢሎም።
እቲ ሃገራዊ ምኽክር ተቐባልነት ዘለዎ ጠንካራ ስርዓተ መንግሥቲ፣ኣብ ዘየረዳድኡ ጉዳያት ብምዝታይ ንምርድዳእን ስርዓት ዲሞክራሲ ንምፅናዕን ወሳኒ ከምዝኾነ እውን ተዛሪቦም።
ነዚ ድማ እቲ ዝተጣየሸ ኮሚሽን ሃገራዊ ምኽክር ዕምቆትን ባህርን እቲ ፀገም ብምርዳእ ካብ ካልኦት ሃገራት ብዝሓሸ መንገድን ሜላን ስራሕቲ እናሳለጠ ከምዝርከብ ሓቢሮም።
ጠንካራ ትካላት ብምህናፅ፣ማሕበራዊ ምትእስሳር ብምጥንኻርን ሓዱሽ ማሕበራዊ ውዕሊ ብምፍጣርን ኣፈላላያት ናብ ምትሕብባር ምቕያር ዘላቒ ሰላም ንምርግጋፅ ዝለዓለ እጃም ከምዘለዎ ኣረዲኦም።
እቲ ምኽክር መሳርሒ ህንፀት ሰላም ጥራሕ ዘይኮነስ መሰረት ህንፀት ሃገር እዩ ኢሎም።
ኩሎም ኢትዮጵያውያን እዚ ታሪኻዊ ዕድል ብምጥቃም መፃኢ ዕድሎም ንክውስኑን ብሄራዊ ምርድዳእ ንምፍጣርን እጃሞም ንክዋፅኡ ፃውዒት ኣቕሪቦም።