ላዕለዎት ትካላት ትምህርቲ ውልቀ ኣድላይ ረቛሕታት ፅሬት ከማልኡ ይግባእ-ፕሮፌሰር ብርሃኑ ነጋ

ኣዲስ ኣበባ/ነሓሰ 19/2017(ኢዜኣ) ላዕለዎት ትካላት ትምህርቲ ውልቀ ኣድላይ ረቛሕታት ፅሬት ትምህርቲ ብምምላእ ዳግማይ ክምዝገቡ ከምዝግባእ ሚኒስትር ትምህርቲ ፕሮፌሰር ብርሃኑ ነጋ ገሊፆም።
ሚኒስቴር ትምህርትን በዓል መዚ ስልጠናን ትምህርትን ኣብ ፀብፃብ ኣፈፃፅማ ዳግማይ ምዝገባ ላዕለዎት ትካላት ትምህርቲ ውልቀ ምስ ላዕለዎት ትካላት ትምህርቲ ውልቀ ዘትዮም።
ኣብቲ መድረኽ፤ ውፅኢት ዳግማይ ምዝገባ ኣብ ምምሕዳር ከተማ ኣዲስ ኣበባ ዝርከቡ ላዕለዎት ትካላት ትምህርቲ ውልቀ ዕላዊ ኮይኑ።

ሚኒስትር ትምህርቲ ብርሃኑ ነጋ (ፕ/ር) ኣብዚ እዋን ከምዝበልዎ፤ ላዕለዎት ትካላት ትምህርቲ ውልቀ ዳግማይ ብምምዝጋብ ረቛሕታት ፅሬት ትምህርቲ ከማልኡ ይግባእ።
መንግስቲ ፅሬት ትምህርቲ ንምርግጋፅ፣ብቑዕን ተወዳዳርን ሙሁር ሓይሊ ሰብ ንምፍራይ ኣብ ዝሓለፉ ውሑዳት ዓመታት ትኹረት ሂቡ ሰሪሑ እዩ ኢሎም።
ላዕለዎት ትካላት ትምህርቲ ኣብ ህንፀት ብቑዕ ሓይሊ ሰብ ዝለዓለ እጃም ከምዘለዎም ብምግላፅ፤ ይኹን እምበር ተመዚኖም ብቕዓት ዘይብሎም ትካላት ብመሰረት መፅናዕቲ ካብቲ ስርዓት ትምህርቲ ከምዝወፁ ተዛሪቦም።
ሚኒስቴር ትምህርቲ ሓበሬታ ኩሎም ትካላት ትምህርቲ መንግስትን ውልቀን ዝምዝግበሉ ማእኸል ሓበሬታ ከምዘማዕበለ እውን ኣረዲኦም።
ዋና ዳይሬክተር በዓል መዚ ስልጠናን ትምህርትን ኣህመድ አብተው(ዶ/ር) ብግደኦም፤ በቢእዋኑ ኣብ ዳግማይ ምዝገባን ኣድላይነትን ላዕለዎት ትካላት ትምህርቲ ውልቀ ዘተ እናተሳለጠ ከምዝፀንሐ ሓቢሮም።
ፅሬት ትምህርቲ ንምርግጋፅ ግቡእ ረቛሒ ንከማልኡ ተወሳኺ ግዜ ከምዝተውሃቦም ብምሕባር፤ በዚ ድማ ምምሕያሽ ዘርኣዩ ትካላት ከምዘለዉ ኣረዲኦም።