ኣብ ህንፀት ሃገር ኣስተዋፅኦ መናእሰይ ንምዕባይ እጃም መዳርግቲ ኣካላት ክጠናኸር ይግባእ

ኣዲስ ኣበባ/ነሓሰ 18/2017(ኢዜኣ) ኣብ ህንፀት ሃገር ኣስተዋፅኦ መናእሰይ ንምዕባይ እጃም መዳርግቲ ኣካላት ክጠናኸር ከምዝግባእ ሚኒስትር ደቂ ኣንስትዮን ማሕበራዊ ጉዳይን ኤርጎጌ ተስፋዬ (ዶ/ር) ገሊፀን።
መዓልቲ ዓለም ለኸ መናእሰይ “ዝተደመረ ዓቕሚ መናእሰይ ንዕዉትነት ሽቶታት ዘላቒ ልምዓት” ኣብ ትሕቲ ዝብል መሪሕ ሓሳብ ሓለፍቲ ስራሕ ፌደራልን ክልልን፣ ተወከልቲ ኣወዳድባታት መናእሰይ፣ መንግስታውን ዘይመንግስታውን ትካላት ኣብ ዝተረኸብሉ ተኸቢሩ።
ሚኒስትር ደቂ ኣንስትዮን ማሕበራዊ ጉዳይን ኤርጎጌ ተስፋዬ (ዶ/ር) ኣብዚ እዋን ከምዝበልኦ፤ ተረባሕነትን ተሳትፎን መናእሰይ ዘረጋግፁ ብርክት ዝበሉ ስራሕቲ እናተሳለጡ እዮም።
ተረባሕነትን ተሳትፎን መናእሰይ ዘረጋግፁ ምድላዋት ፖሊሲ፣ንኣወዳድባታት ምችው ኩነታት ምፍጣር፣ስራሕቲ ፈጠራ ስራሕ፣ፅሬትን ተበፃሕነትን ትምህርቲ፣መንእሰይ ተኮር ኣገልግሎት ጥዕናን ካልኦት ስራሕትን ከም ኣብነት ፀሪሐን።
መናእሰይ ኣብ ዓውድታት ፖለቲካ፣ማሕበራውን ኢኮኖምን ተሳትፎ እናገበሩ ከምዝርከቡ እውን ኣረዲአን።
መናእሰይ ኣብ ስራሕቲ ህንፀት ሃገር ዘበርክትዎ ኣስተዋፅኦ ብዝበለፀ ውፅኢታዊ ንክኸውን እጃም መዳርግቲ ኣካላት ክጠናኸር ይግባእ ኢለን።
መናእሰይ ብዝተደመረ ዓቕሚ ብምንቅስቓስ ንብልፅግና ኢትዮጵያ ዘበርክትዎ ኣስተዋፅኦ ከጠናኽሩ ከምዝግባእ ብምግላፅ፤ ዝተዋደደ ኣሰራርሓ መዳርግቲ ኣካላት ክዓቢ ከምዘለዎ እውን ተዛሪበን።
ፕሬዚዳንት ቤት ምኽሪ መናእሰይ ኢትዮጵያ ፉኣድ ገና ብግድኡ፤ መዓልቲ መናእሰይ እነኽብሮ እታ እንምነያ ኢትዮጵያ ብዝተደመረ ዓቕሚ መናእሰይ ጋህዲ ንምግባር ብምሕላም እውን እዩ ኢሉ።
እቲ ቤት ምኽሪ መናእሰይ ቀፃሊ ዕድሎም ብናይ ባዕሎም ፃዕሪ ዝሃንፁን ናብ ወለዶ ዘውርሱዎ ፀጋ ምፍጣርን ዝኽእሉ፣ዝነቕሐን ዝበቕዐን ወለዶ ንምፍጣር ብምሕላም ዝተጣየሸ ኣወዳድባ ከምዝኾነ ገሊፁ።
መካየዲ ስራሕ ዩዝ ኔትወርክ ፎር ሰስተነብል ዴቨሎፕመንት ኣይተ ኢሳያስ ኣለማየሁ፤ ዓቕሚ መናእሰይ ምጥንኻር ዘኽእሉ ስራሕቲ ኣብ ሓለዋ ከባቢ፣ጥዕና፣ሰብኣዊነትን ካልኦት ጉዳያትን እናሰርሑ ከምዝኾኑን ተጠናኺሩ ከምዝቕፅልን ኣረዲኦም።
ኢንጀንደርድ ሄልዝ ዝተብሃለ ዓለም ለኸ ትካል ወኪሎም ኣብቲ መርሃ ግብሪ ዝተረኸቡ ኣይተ ብሩክ ማሞ፤ እቲ ትካል ተረባሕነትን ተሳትፎን መናእሰይ ንምጥንኻር ዘሳልጦም ስራሕቲ ተጠናኺሮም ከምዝቕፅሉ ተዛሪቦም።