ፋብሪካ ወርቂ ኩርሙክ ኣብ ዝቕፅል ዓመት ናብ ፍርያት ክኣቱ እዩ-ቀዳማይ ሚኒስትር ዐቢይ ኣሕመድ(ዶ/ር) - ኢዜአ ትግርኛ
ፋብሪካ ወርቂ ኩርሙክ ኣብ ዝቕፅል ዓመት ናብ ፍርያት ክኣቱ እዩ-ቀዳማይ ሚኒስትር ዐቢይ ኣሕመድ(ዶ/ር)

ኣዲስ ኣበባ/ነሓሰ 18/2017(ኢዜኣ) ፋብሪካ ወርቂ ኩርሙክ ኣብ ዝቕፅል ዓመት ብፍርቂ ዓቕሙ ምፍራይ ከምዝጅምር ቀዳማይ ሚኒስትር ዐቢይ ኣሕመድ(ዶ/ር) ገሊፆም።
እቶም ቀዳማይ ሚንሲትር ኣብ ኣሶሳ ዝነበሮም ፃንሒት ኣመልኪቶም ኣብ ዝሃብዎ መብራህርሂ፤ ኣሶሳ ቅድሚ ሓደ ዓመት ኣብ ዝጎብነይሉ እዋን ካብ ዝነበረቶ ኩነታት ተለዊጣ ምዕዛቦም ሓቢሮም።
ለውጢ እታ ከተማ ዝተባባዕ ምዃኑ ብምግላፅ፤ ከተማ ኣሶሳ መርኣያ ትሩፋት ልምዓት ኮሪደር ካብ ዝኾና ከተማታት እታ ሓንቲ እያ ኢሎም።
ካብ ኣሶሳ ኣብ ዝተወሰኑ ሚኢቲ ኪሎ ሜትራት ርሕቕት ዝርከብን ብማሽን ዝተደገፈን ዘበናዊ ፋብሪካ ዝነኣድ ውፅኢት ስራሕ ፋብሪካ ወርቂ ኩርሙክ ከምዝኾነ ሓቢሮም።
እቲ ፋብሪካ ልዕሊ 20 ኪሎ ሜትሮ ስፍሓት ዝሽፍን፣ሰለስተ ግድባትን ካምፕታትን ከምዘለውዎ ብምሕባር፤ ድሕሪ ፍርቂ ዓመት ቀፃሊ ዓመት ናብ ፍርያት ከምዝኣቱ ኣረዲኦም።
እቲ ፋብሪካ ወርቂ፤ ኣብ 2019 ዓ/ም ናብ ሙሉእ ዓቕሚ ምፍራይ እንትኣቱ ናይ 1 ቢልዮን ዶላር ኣታዊ ከምዝርከብ ትፅቢት ይግበር ኢሎም።
ኢትዮጵያ ኣብ ዓውዲ ወርቂ ዕቑር ዓቕሚ ከምዘለዋ ብምግላፅ፤ ፋብሪካ ወርቂ ኩርሙክ ኢትዮጵያ ወርቂ ብባዕላ ኣቀነባቢራን ኣፍርያን ምሻጥ ዘኽእላ ከምዝኾነን እዚ ድማ ዓብዪ ሽግግር ፍልጠት ከምዝፈጥርን ገሊፆም።
እቲ ዝተጀመረ ስራሕ ዋላ ኳ ዝተባባዕ እንተኾነ ሕዚ እውን ክትትልን ደገፍን ከምዘድልዮ ተዛሪቦም።
ክልል ቤኒሻንጉል ጉሙዝ ኣብ ሕርሻ፣ቱሪዝምን ዝተፈላለዩ ዓውድታትን ዘለዎ ዕቑር ዓቕሚ ንጉዕዞ ብልፅግና ኢትዮጵያ ከምዝሕግዝ እውን ፀሪሖም።