እቲ ወሰኽ ደሞዝ ሰራሕተኛ ንዝበለፀ መፍረያይነት ዘለዓዕል እዩ-እቲ ኮንፌዴሬሽን

ኣዲስ ኣበባ/ነሓሰ 17/2017(ኢዜኣ) እቲ ወሰኽ ደሞዝ ሰራሕተኛ ንዝበለፀ መፍረያይነት ዘለዓዕል እዩ ክብሉ ፕሬዚዳንት ኮንፌዴሬሽን ማሕበራት ሰራሕተኛ ኢትዮጵያ ካሳሁን ፎሎ ገሊፆም።
መንግስቲ ንዜጋታት ተኸፈልቲ ቀዋሚ ደሞዝ ፅልዋ መነባብሮ ንምቅላል ካብ ወርሒ መስከረም 2018 ዓ/ም ጀሚሩ ወሰኽ ደሞዝ ምግባሩ ምግላፁ ዝፍለጥ እዩ።
ፕሬዚዳንት ኮንፌዴሬሽን ማሐበራት ሰራሕተኛ ኢትዮጵያ ካሳሁን ፎሎ ምስ ኢዜኣ ኣብ ዝነበሮም ፃንሒት ከምዝበልዎ፤ እቲ ወሰኽ ደሞዝ ናይ ነዊሕ እዋን ሕቶ ዝመለሰ እዩ።
እዚ ወሰኽ፤ ፅዕንቶ መነባብሮ ሰራሕተኛ መንግስቲ ብምቅላል እቲ ሰራሕተኛ ኣብ ስራሕ ዝበለፀ መፍረያይ ንክኸውንን ቅልጡፍ ኣገልግሎት ንክህብን ዘኽእል እዩ ኢሎም።
እቲ ወሰኽ ስዒቡ ወሰኽ ዋጋ ከየጋጥም መንግስቲ ኣብ ቁፅፅር ብትኹረት ክሰርሕ ከምዘለዎ እውን ሓቢሮም።
ብተወሳኺ እውን ሸማቲ ማሕበረሰብ ግቡእ ዘይኮነ ወሰኽ ዋጋ ከይፍጠር እጃሙ ክዋፃእ ከምዘለዎ ሓቢሮም።
መንግስቲ ንዝገበሮ ወሰኽ ደሞዝ እውን ምስጋና ኣቕሪቦም።