ኣሸንዳ ብነፃነትን ብፍሉይ ሓጎስን ከምዘኽብርኦ ተሳተፍቲ እቲ በዓል ገሊፀን

መቐለ/ነሓሰ 17/2017(ኢዜኣ) በዓል ኣሸንዳ ብፍሉይ ናፍቖት፣ብነፃነትን ሓጎስን ከምዘኽብርኦ ኣብ ከተማ መቐለ ኣብ ዝኽበር ዘሎ እቲ በዓል ዝሳተፋ ዘለዋ ደቂ ኣንስትዮ ገሊፀን።
በዓል ኣሸንዳ በቢዓመቱ ካብ ፍርቂ ወርሒ ነሓሰ ጀሚሩ ብደቂ ኣንስትዮ ብድሙቕ ዝኽበር በዓል እዩ።
ኣብ ከተማ መቐለ ኣብ ዝኽበር ዘሎ በዓል ኣሸንዳ ካብ ዝሳተፋ ዘለዋ ደቂ ኣንስትዮ ንኢዜኣ ከምዝበልኦ፤ ኣሸንዳ ባህላዊ ክብሩ ብዝሓለወን ነባር ክብርታት ብዘንፀባርቕን መልክዑ ብድሙቕ እናኽበራ እየን ዝርከባ። 
ተሳታፊት እቲ በዓ መንእሰይ ፊዮሪ ገብረስላሴ፤ ኣሸንዳ ክብርታቱ ተሓልዮም ንክፀንሑ ደቂ ኣንስትዮ ጠንኪርና ክንሰርሕ ኣለና ኢላ።
ኣሸንዳ ትሕዝትኡ ሓልዩ ናብ ቀፃሊ አለዶ ንክመሓላለፍ እጃምና ክንዋፃእ ኣለና ዝበለት መንእሰይ ሸገ ኣሸናፊ፤ መግለፂ እቲ በዓል ዝኾኑ ባህላዊ ፀጋታት ከይብረዙ ጠንኪርና ክንቀሳቐስ ይግባእ ክትብል ሓቢራ።
መንእሰይ ሂወት በርሀ ብግደኣ፤ ደቂ ኣንስትዮ በዓል ኣሸንዳ ካብ ኣከዳድና ጀሚሩ ብኣሰራርሓ ፀጉርን ባህላዊ መጋየፅታትን ፀቢቐን ኣብ ምኽባር ከምዝርከባ ገሊፃ።
በዓል ኣሸንዳ ብብርኪ ክልል ፕሬዚዳንት ግዝያዊ ምምሕዳር እቲ ክልል ሌ/ጀነራል ታደሰ ወረደ ሓዊሱ ሚኒስትር ባህልን ስፖርትን ሸዊት ሻንካ፣ሚኒስትር ደቂ ኣንስትዮን ማሕበራዊ ጉዳይን ኤርጎጌ ተስፋዬ(ዶ/ር)፣ሚኒስትር ከተማን መሰረተ ልምዓትን ጫልቱ ሳኒን ካልኦት ኣጋይሽን ኣብ ዝተረኸብሉ ትማሊ ኣብ ከተማ መቐለ ብድሙቕ ምኽባሩ ዝዝከር እዩ።