ምዕሩጋት ባህልታትን ክብርታትን ኢትዮጵያ ሓሊና ናብ ወለዶ ንምምሕልላፍ ተዋዲድና ክንሰርሕ ኣለና - ሚኒስትር ሸዊት ሻንካ

መቐለ/16 ነሓሰ/2017(ኢዜኣ) ምዕሩጋት ባህልታትን ክብርታትን ኢትዮጵያ ብምልማዕ ናብ ወለዶ ንምምሕልላፍ ተዋዲድና ክንሰርሕ ኣለና ክብላ ሚኒስትር ባህልን ስፖርትን ሸዊት ሻንካ ገሊፀን።
ሚኒስትር ባህልን ስፖርትን ሸዊት ሻንካ፣ ሚኒስትር ደቂ ኣስትዮን ማሕበራዊ ጉዳይን ኤርጎጌ ተስፋዬ(ዶ/ር)፣ሚኒስትር ከተማን መሰረተ ልምዓትን ጫልቱ ሳኒ ከምኡ እውን ፕሬዚዳንት ግዝያዊ ምምሕዳር ክልል ትግራይ ሌተናል ጄኔራል ታደሰ ወረደን ካልኦት ኣጋይሽን ኣብ ዝተረኸብሉ በዓል ኣሸንዳ ሎሚ መዓልቲ ኣብ ከተማ መቐለ ተኸቢሩ።


ኣብቲ እዋን ሚኒስትር ሸዊት ሻንካ ኣብ ዝገበርኦ መደረ፤ ወናኒት ምዕሩግ ባህልን ታሪኽን ዝኾነት ሃገርና ንምልማዕን ንምምዕባልን ኩልና ኢድ ንኢድ ተተሓሒዝና ክንሰርሕ ኣለና ኢለን።
ብፍላይ ኣብቲ ኸባቢ ዘለው ምዕሩጋት ባህልታትን ክብርታትን ኢትዮጵያውያን ሓሊና ብምልማዕ ናብ ወለዶ ንምምሕልላፍ ተዋዲድና ክንሰርሕ ኣለና ክብላ ገሊፀን።
ደቂ ኣንስትዮ ነፃነተን ዝገልፃሉ መግለፂ ሰላም፣ፍቕሪ፣ሓድነትን ምትሕባብርን ዝኾነ በዓል ኣሸንዳ ካብ ምጥንኻር ብተወሳኺ መስሕብ ቱሪስት ንክኸውን ምስራሕ ከምዝግባእ እውን ፀሪሐን።
ኣሸንዳ ንዘኽብራ ዘለዋ ደቂ ኣንስትዮን መላእ ህዝቢ ትግራይን ናይ ሰላምን ፍቕርን በዓል ንክኸውን ሰናይ ትምኒተን ገሊፀን።
ፕሬዚዳንት ግዝያዊ ምምሕዳር ክልል ትግራይ ሌተናል ጄኔራል ታደሰ ወረደ ብግደኦም፤ በዓል ኣሸንዳ መርኣያ ሰላምን ሓድነትን እዩ ኢሎም።
እቲ በዓል ብዝበለፀ ተጠናኺሩ ንክቕፅልን ንክለምዕን ብትኹረት ከምዝስራሕ እውን ተዛሪቦም።



ሓላፊ ቢሮ ባህልን ቱሪዝም ግዝያዊ ምምሕዳር እቲ ክልል ኣፅበሃ ገብረእግዚኣብሄር(ዶ/ር)፤ ባህላዊ ትሕዝቶ ዘለዎ በዓል ኣሸንዳ ከይተበረዘ ክብሩ ሓልዩ ንክቕፅል ኩላትና ብሓባር ክንሰርሕ ኢና ክብሉ ገሊፆም።



 

የኢትዮጵያ ዜና አገልግሎት
2015
ዓ.ም