ትካላት ሲቪል ማሕበረሰብ ኣብ ዲሞክራሲ፣ልምዓትን ካልኦት ሃገራዊ ጉዳያትን ዝለዓለ ተሳትፎ እናገበሩ እዮም-በዓል መዚ ትካላት ሲቪል ማሕበረሰብ

ኣዲስ ኣበባ/ነሓሰ 16/2017 (ኢዜኣ) ኣብ ዓውዲ ሲቪል ማሕበረሰብ ዝተሳለጠ ሪፎርም ትካላት ሲቪል ማሕበረሰብ ኣብ ዲሞክራሲ፣ልምዓትን ካልኦት ሃገራዊ ጉዳያትን ተሳትፎ ዝገብርሉ ዕድል ከምዝፈጠረ በዓል መዚ ትካላት ሲቪል ማሕበረሰብ ኣፍሊጡ።
ተሳትፎ ትካላት ሲቪል ማሕበረሰብ ዝግድብ ዝነበረ ቁፅሪ ኣዋጅ ትካላትን ማሕበራትን ገበርቲ ሰናይ 621/2001 ተመሓይሹ ብቁፅሪ ኣዋጅ ትካላት ሲቪል ማሕበረሰብ 1113/2011 ከምዝተተክአ ዝፍለጥ እዩ።
ምክትል ዋና ዳይሬክተር በዓል መዚ ትካላት ሲቪል ማሕበረሰብ ፋሲካው ሞላ ንኢዜኣ ከምዝበልዎ፤ ኣብቲ ዓውዲ ዝተገበረ ሪፎርም ሲቪል ማሕበረሰብ ኣብ ልምዓት፣ዲሞክራስን ህንፀት ሃገርን ዝህልዎ ተሳትፎ ንምዕባይ ዝዓለመ እዩ።
እቲ ኣዋጅ ትካላት ሲቪል ማሕበረሰብ ኣብ ሕጋውን ሞራላውን ጉዳያት ብነፃነት ዝሰርሕሉ፣ካብ ውሽጢ ሃገርን ወፃእን ሃፍቲ ዝእክብሉ መሰል ዘገናፀፈ እዩ ኢሎም።
ዘበናዊ ኣሰራርሓታት ብምትካል ንትካላት ሲቪል ማሕበረሰብ ኦንላይን ኣገልግሎት እናተውሃበ ከምዝኾነ ብምሕባር፤ እቲ ሪፎርም ኣብ መንጎ መንግስትን ትካላት ሲቪል ማሕበረሰብን ዝበለፀ ምቅርራብ ብምፍጣር ውፅኢታት ንክምዝገቡ ከምዘኽኣለ እውን ሓቢሮም።
ኣብ ኢትዮጵያ 5 ሽሕን 500 ትካላት ሲቪል ማሕበረሰብ ከምዘለዉ ብምግላፅ፤ እቶም ልዕሊ 3 ሽሕ ድሕሪ እቲ ሪፎርም ዝተመዝገቡ ሓደሽቲ ትካላት ከምዝኾኑ ኣረዲኦም።
ብተወሳኺ እውን ኩለመዳያዊ ተረባሕነት ሕብረተሰብ ዘዕብዩ 2 ሽሕን 800 ፕሮጀክትታት ብትካላት ሲቪል ማሕበረሰብ ተግባራዊ እናተገበሩ ከምዝኾኑ ፀሪሖም።
ፕሬዝዳንት ቤት ምኽሪ ትካላት ሲቪል ማሕበረሰብ ኣይተ ኣህመድ ሁሴን ብግደኦም፤ ቅድሚ እቲ ሪፎርም ዝነበረ ኣዋጅ ትካላትን ማሕበራትን ገበርቲ ሰናይ ትካላት ሲቪል ማሕበረሰብ ከም ስግኣት ዝርእን ተሳትፎኦም ዝግድብን ከምዝነበረ ኣዘኻኺሮም።
እቲ ሪፎርም ስዒቡ ኣብ ስራሕ ዝወዓለ ኣዋጅ ትካላት ሲቪል ማሕበረሰብ 1113/2011 ትካላት ሲቪል ማሕበረሰብ ኣብ መረፃ፣ሰብኣውን ዲሞክራሲያውን መሰልን ተዛመድቲ ጉዳያትን ዝለዓለ ተሳትፎ ንክህልዎም ኣኽኢሉ እዩ ኢሎም።