ባህላውን ሃይማኖታውን ፀጋታትና መርኣያ ሕብረ ብሄራዊ ሓድነትና እዮም-ኣገልግሎት ኮሙኒኬሽን መንግስቲ

ኣዲስ ኣበባ/ነሓሰ 16/2017 (ኢዜኣ) ባህላውን ሃይማኖታውን ፀጋታትና መርኣያ ሕብረ ብሄራዊ ሓድነትና ከምዝኾኑ ኣገልግሎት ኮሙኒኬሽን መንግስቲ ኣፍሊጡ።
ኣገልግሎት ኮሙኒኬሽን መንግስቲ ፌዴሪኢ ንበዓል ኣሸንዳ፣ሻደይ፣ኣሸንድዬን ሶለልን መልእኽቲ እንኳዕ ኣብፀሐኩም ኣመሓላሊፉ።
መልእኽቲ እንኳዕ ኣብፀሐኩም ኣገልግሎት ኮሙኒኬሽን መንግስቲ ፌዴሪኢ ከምዚ ዝስዕብ ቀሪቡ፦
ብዝሃነትን ሕብረ ብሄራዊ ሓድነትን መግለፂኣ ዝኾነት ኢትዮጵያ ወናኒት ምዝዛም ክረምቲ ዘበስሩ ፀጋታት እያ።
ካብ ፍርቂ ወርሒ ነሓሰ ጀሚሩ ደቂ ኣንስትዮ ናብ ኣደባባይ ብምውፃእ ዘስምዐኦም ሕብረ ዝማሬታት ኣብ ሰሜናዊ ክፋል ኢትዮጵያ ምውዳእ ክረምቲ፣ኣብ ጎቦታትን ሽንጥሮታትን ዘለዉ ዕምበባታት፣ምፅራይ ፍልፍላትን ምፍራይ ዝራእትን የበስራ።
ካብዞም ባህላውን ሃይማኖታውን ፍፃመታት ካብ ፍርቂ ነሓሰ ጀሚሩ ንመዓልትታት ብድሙቕ ዝኽበርን ኣብ ዝተፈላለዩ ከባብታት ብዝተቐራረበን ኣሸንዳ፣ ሻደይ፣ ኣሸንድዬን ሶለልን ተባሂሉ ዝፅዋዕ በዓል እቲ ሓደ እዩ።
እቲ በዓል ኣብ ዝተፈላለዩ ከባብታት ብዝተፈላለዩ ፀጋታት ብዝተቐራረበ ርድኢት፣ኣብ ተመሳሳሊ እዋን፣ ብዝተፈላለዩ ሕብረ ዝማሬታት ብደቂ ኣንስትዮ ዝኽበር በዓል ነፃነትን ኣደባባይን እዩ።
እዚ በዓል ርክብን ምትእስሳርን ጎረባብቲ ህዝብታት ብዘጠናኽር መልክዑ ምኽባር፣ምሕላውን ናብ ወለዶ ምምሕልላፍን ይግባእ።
እዚ በዓል ዋላ እኳ ካብ ወለዶ ናብ ወለዶ እናተወራረሰ እንተመፀ ብኣግባቡ ተላልዩ ሓደ ሃፍቲ መስሕብ ንክኸውን ተወሳኺ ስራሕ የድሊ እዩ።
ብተወሳኺ እውን ካብ ፍርቂ ነሓሰ ጀሚሩ ኣብ ዝተፈላለዩ ክፋላት ሃገርና ዝኽበሩ ዝተፈላለዩ በዓላት ብምትእስሳር ሕብረ ብሄራዊነት ብዝሃንፅ መልክዑ ምስራሕ ይሓትት።
መዓልትታት ጳጉሜን፣ሓዱሽ ዓመት ኢትዮጵያ፣በዓላት መለወጢ ዘበን ዝተፈላለዩ ብሄርን ብሄረሰባትን፣በዓል መስቀልን ኢሬቻን ተቐራሪቦም ዝበዓሉ ስለዝኾኑ ፃንሒት ጎብነይቲ ንምንዋሕ ርኡይ እጃም ክህልዎም ዝኽእል እዮም።
ስለዝኾነ እውን ብመሰረት ባህላውን ሃይማኖታውን ፀጋታቶም ብድሙቕ እናተኸበሩ ዓውዲ ቱሪዝም ኣብ ምንቕቓሕ እጃሞም ንከበርክቱ መንግስቲ ኣድላይ ደገፍ ክገብር እዩ።
እንኳዕ ንበዓል ኣሸንዳ፣ሻደይ፣ኣሸንድዬን ሶለልን ኣብፀሐኩም!
ኣገልግሎት ኮሙኒኬሽን መንግስቲ ፌዴሪኢ
16 ነሓሰ 217 ዓ/ም