ኣብዚ ሓዱሽ በጀት ዓመት ቁፅሪ ዜጋታት ተጠቀምቲ ዲጂታል መለለዪ መንነት ልዕሊ 60 ሚልዮን ንምብፃሕ ተተሊሙ-ፕሮግራም ብሄራዊ መለለዪ መንነት

ኣዲስ ኣበባ/ነሓሰ 15/2017(ኢዜኣ) ኣብ በጀት ዓመት 2018 ቁፅሪ ዜጋታት ተጠቀምቲ ዲጂታል መለለዪ መንነት ልዕሊ 60 ሚልዮን ንምብፃሕ ከምዝተለመ ፕሮግራም ብሄራዊ መለለዪ መንነት ኣፍሊጡ።
ብሄራዊ መለለዪ መንነት ፋይዳ ባዮ ሜትሪክ ነበርቲ(ኣሰር ኣፃብዕቲ፣ኣይሪስ ዓይንን ምስሊ ገፅን) ከምኡ እውን ውልቃዊ ሓበሬታታት ብምእካብ ሓደ ውልቀ ሰብ ፍሉይ ብዝኾነ መልክዑ ንክልለ ዘኽእል እዩ።
ዳይሬክተር መዳርግቲ ኣካላትን ኮሙኒኬሽንን ፕሮግራም ብሄራዊ መለለዪ መንነት ሳሚናስ ሰይፉ፤ ክሳብ ሎሚ ብዘሎ ሓበሬታ ልዕሊ 22 ነጥቢ 4 ሚልዮን ዜጋታት ወነንቲ ዲጂታል መለለዪ መንነት ፋይዳ ከምዝኾኑ ንኢዜኣ ገሊፆም።
እዚ ድማ ኣብ ወርሒ መስከረም 2018 ዓ/ም ቁፅሪ ፋይዳ ዘለዎም ዜጋታት ካብ 20 ሚልዮን ናብ 25 ሚልዮን ንምብፃሕ ብዝተትሓዘ ትልሚ ውፅኢታዊ ኣፈፃፅማ ከምዝተመዝገበ ሓቢሮም።
ኣብ በጀት ዓመት 2018 ተወሳኺ 40 ሚልዮን ዜጋታት ተጠቀምቲ መለለዪ መንነት ፋይዳ ንምግባር ትልሚ ከምዝተትሓዘ ፀሪሖም።
ዲጂታል መለለዪ ምስ ኣገልግሎት ትካላት ኣብ ምትእስሳር እውን ኣብ ኢትዮጵያ ዝርከቡ 32 ባንክታት ሓዊሱ ክሳብ ሕዚ 55 ትካላት ዓማዊሎም ብቁፅሪ መፍለዪ ፋይዳ ናይ ምርግጋፅ ስራሕ እናሳለጡ እዮም ኢሎም።
 ኣብዚ ሓዱሽ በጀት ዓመት ምስ ዲጂታል መለለዪ መንነት ዝተኣሳሰሩ ትካላት በዝሖም ልዕሊ 300 ንምብፃሕ ከምዝስራሕ እውን ኣረዲኦም።
ዲጂታል መንነትን ኣገልግሎትን ንክሰፍሕ ብምግባር ኣብ ስትራቴጂ ዲጂታል ኢትዮጵያ እውን እጃሙ እናበርከተ እዩ ኢሎም።