ህጹጽነት ለበዳ ኮቪድ-19 ከም ዘብቅዐ ውድብ ጥዕና ዓለም ኣዊጁ

ውድብ ጥዕና ዓለም፡ ኣብ ጥሪ 2020 እዩ ንፈለማ እዋን ዓለማዊ ለበዳ ምዃኑ ኣዊጁ ነይሩ።

እቲ ውሳነ፡ ነቲ ቫይረስ ንምክልኻል ዓለምለኻዊ ምትሕግጋዝ ክግበር ዘገድድን ዝእውጅን'ዩ።

እዚ ሓድሽ ኣዋጅ ግን፡ ሃገራት ብዝመስለን ኣገባብ ነቲ ቫይረስ ክከላኸላ ናጽነት ዝህብ'ዩ።

ክታበት ኣብ ምግታእ እቲ ለበዳ ዓቢ ተራ ከምዝነበሮ'ዩ ዝግለጽ። ውድብ ጥዕና ዓለም ከምዝሕብሮ፡ ሰባት ካብ ሞት ንምክልኻል 13 ቢልዮን ክታበታት ኮሮናቫይረስ ተዋሂቡ።

ኣብ ብዙሓት ሃገራት ግን፡ እቲ ክታበት ንኹሉ ዘድልዮ ኣይተባጽሐን።

ኣብ ምሉእ ዓለም ዝተመዝገበ መጠን መልከፍቲ ልዕሊ 765 ሚልዮን ምብጽሑ ጸብጻባት የመልክቱ።

ኣመሪካን ብሪጣንያን ዝርከብአን ብዙሓት ሃገራት "ምስቲ ቫይረስ ምንባር" ዝብል መምርሒ ብምኽታል፡ ንዝገብርኦ ዝነበራ መርመራታትን ዝኣወጅኦ ማሕበራዊ እገዳታትን ኣወጊደንኦ'የን።

ሓላፊ ህጹጽ ጥዕናዊ ኩነታት ውድብ ጥዕና ዓለም ዝኾነ ዶ/ር ማይክ ሪያን ከምዝበሎ፡ ዋላ'ኳ እቲ ህጹጽነት ናይቲ ለበዳ እንተኣብቀዐ፡ እቲ ቫይረስ ግን ሕዚ'ውን ሓደገኛ ምዃኑ ኣጠንቂቑ።

"እቲ ቫይረስ ምምሕልላፍ ክቕጽል ምዃኑ ምሉእ ብምሉእ እንጽበዮ እዩ፡ ታሪኽ ለበዳታት ከምኡ ስለዝኾነ"።

"ኣሰር ለበዳ ቫይረስ 1918 ንክጠፍእ ዓሰርተታት ዓመታት'ዩ ወሲዱ"።

"ዝበዝሕ እዋን፡ ዝቕጽል ለበዳ ኣብ ዝጅምረሉ'ዩ እቲ ዝጸንሐ ለበዳ ናይ ብሓቂ ዘብቅዕ"።