270 Qof oo Qalliin Loogu Sameynayo Si Bilaash ah Ismaamulka Diridhaba

Diridhaba; Naaf 15/2018 (ENA): Xafiiska Caafimaadka Ismaamulka Diridhaba ayaa sheegay in isbitaallada dowladda iyo kuwa gaarka loo leeyahay ay iska kaashanayaan barnaamijka samafalka caafimaad ee xilligan, kaas oo loogu talagalay bulshada aan awoodin kharashaadka daaweynta.

 

Isbitaallada dowladda iyo kuwa gaarka loo leeyahay ayaa heshiis iskaashi ah ka gaaray bixinta adeegyada caafimaad ee bilaashka ah, waxaana la filayaa in barnaamijku dhawaan u gudbo marxaladda fulinta.

 

Sida lagu sheegay xogta barnaamijka, 270 bukaan oo u baahan qalliin, balse aan awoodin inay iska bixiyaan kharashaadka adeegga caafimaad ee isbitaallada gaarka loo leeyahay, ayaa adeeggan ka faa'iideysan doona.

 

Waxaa sidoo kale barnaamijka lagu daweyn doonaa carruur qaba xanuunnada wadnaha, kuwaas oo baahidooda caafimaad hore loogu aqoonsaday dugsiyada.

 

Madaxa Xisbiga Barwaaqo ee laanta Diridhaba, Mudane Ibraahim Yuusuf, ayaa sheegay in bulshada danyarta ah iyo dadka aan awoodin adeegyada caafimaad ee isbitaallada gaarka loo leeyahay loo fidiyo adeegyo samafal oo noocan ah ay tahay hawl muhiim ah oo mudan in la sii wado.

 

Wuxuu sheegay in Ismaamulka Diridhaba uu bixin doono taageerada iyo fududeynta lagama maarmaanka u ah hirgelinta adeeggan.

 

Madaxa Xafiiska Caafimaadka Ismaamulka Diridhaba, Dr. Tsigeradaa Kiflee, ayaa sheegtay in barnaamijkan lagu caawinayo bukaanno muddo sugayay qalliin loogu sameeyo isbitaallada dowladda, kuwaas oo aan awoodin inay iska bixiyaan kharashaadka isbitaallada gaarka loo leeyahay.

 

Dr. Tsigeradaa ayaa sheegtay in 270-ka qof ee ka faa'iideysanaya adeeggan ay ku jiraan 135 qof oo u baahan qalliin, iyadoo sidoo kale adeegga loo fidinayo carruurta qaba xanuunnada wadnaha.

 

Waxay u mahadcelisay isbitaallada iyo dhammaan dhinacyada caafimaadka ee ka qayb qaadanaya barnaamijkan samafalka ah.

 

Maamulayaasha iyo xirfadlayaasha caafimaadka ee ka qayb galay kulanka ayaa sheegay in ay ku faraxsan yihiin ka qaybqaadashada hawshan samafalka ah, ayna ka go'an tahay inay si wanaagsan oo xilkasnimo leh u fuliyaan adeegyada loo qorsheeyay bulshada.