Dowladda Japan ay ku maalgelinayso 9.4 milyan oo Birr suuqa khudaarta ee Haweenka Godey — Danjire Shibata Hironori

Addis Ababa, Cirir 27/2018 (ENA): Safiirka Japan u fadhiya Itoobiya, Danjire Shibata Hironori, ayaa sheegay in dowladda Japan ay sii wadi doonto taageerada ay siiso bulshada dalka, gaar ahaan mashaariicda kor u qaadaya nolosha dadka iyo horumarinta dhaqaalaha bulshada. Hadalkan ayuu ka jeediyay munaasabadda saxiixa mashruuca dhismaha Suuqa Khudaarta ee haweenka magaalada Godey.

Danjire Shibata Hironori ayaa tilmaamay in mashruucan lagu fulinayo barnaamijka Deeqda Taageerada Mashaariicda Horumarinta Bulshada ee Heerka Hoose (GGP), kaas oo diiradda saaraya taageerada bulshooyinka u baahan horumar iyo adeegyo aasaasi ah. Wuxuu sheegay in mashruucu uu awood siin doono haweenka ganacsatada ah ee iibiya khudaarta, isla markaana uu kor u qaadi doono helitaanka khudaar tayo leh oo nadiif ah.

Danjiraha ayaa sidoo kale xusay in tan iyo sanadkii 1989, markii la aasaasay barnaamijka GGP, dowladda Japan ay ka hirgelisay in ka badan 450 mashruuc oo kala duwan gudaha Itoobiya. Mashruucyadan ayaa diiradda saaraya horumarinta bulshada, iyadoo lagu taageero dhinacyada waxbarashada, caafimaadka, koboca dhaqaalaha, tababarrada xirfadaha, helitaanka biyaha iyo nadaafadda, iyo sugidda amniga cuntada.

Danjire Shibata Hironori ayaa sheegay in Japan ay sii wadi doonto iskaashiga ay la leedahay Itoobiya si loo xoojiyo horumarka bulshada, isagoo xusay in mashruuca suuqa khudaarta Godey uu tusaale u yahay iskaashiga wax ku oolka ah ee u dhexeeya labada dal.

 

Dhankiisa, Maareeyaha Hay’adda Association Develop Horn (AD HORN) Cabdullaahi Suldaan Cali ayaa uga mahadceliyay dowladda Japan taageerada ay siisay mashruucan, isagoo sheegay in suuqa cusub uu gacan ka geysan doono kobcinta dhaqaalaha haweenka ganacsatada ah iyo horumarinta ganacsiga khudaarta ee magaalada Godey.