Heshiiska Itoobiya iyo Kongo (Brazzaville) ayaa xoojinaya la dagaallanka argagixisada iyo amniga gobolka

Addis Ababa, Xoorreey 4/2018 (ENA): Wasiirka Gaashaandhigga Itoobiya, Inj. Caasha Maxamed, ayaa sheegtay in heshiiska iskaashi ee ay kala saxiixdeen Itoobiya iyo Jamhuuriyadda Kongo (Brazzaville) uu door weyn ka qaadanayo la dagaallanka argagixisada ka gudubta xuduudaha iyo caqabadaha amni ee gobolka. Waxay tilmaantay in iskaashigu yahay mid ku habboon xaaladda amni ee dunida maanta.

Labada dal ayaa kala saxiixday heshiis is-afgarad oo ku saabsan iskaashi ciidan, kaas oo diiradda saaraya warshadaha militariga, dayactirka hubka, tababarro iyo waxbarasho ciidan, iyo howlaha nabad-ilaalinta. Heshiiskan ayaa u oggolaanaya labada dal inay si wadajir ah uga faa’iideystaan awooddooda militari.

 

Inj. Caasha Maxamed ayaa xustay in xiriirka diblomaasiyadeed ee Itoobiya iyo Kongo uu soo bilowday horraantii lixdamaadkii, kaddib markii Kongo ay xorriyaddeeda qaadatay. Waxay sheegtay in xiriirkaasi uu si gaar ah ugu xoogaystay madalaha caalamiga ah sida OAU iyo Midowga Afrika.

 

Dhankiisa, Wasiirka Gaashaandhigga Kongo Brazzaville, Jaarles Rijard Mondjo, ayaa sheegay in heshiisku uu si weyn u xoojin doono nabadda iyo amniga labada dal. Wuxuu carrabka ku adkeeyay in hirgelinta heshiiska si degdeg ah loo bilaabi doono.

Ugu dambayn, labada dhinac waxay adkeeyeen in iskaashiga militari iyo diblomaasiyadeed uu sii xoojin doono xiriirka labada dal isla markaana uu gacan ka geysan doono xasilloonida gobolka. Wasiirka Gaashaandhigga Kongo ayaa sidoo kale martiqaad rasmi ah u fidiyay Inj. Caasha Maxamed si ay booqasho ugu tagto Kongo Brazzaville.

#WWI 
#Wakaaladda_Wararka_Itoobiya