Warbaahintu waa inay door muuqda ka qaadato ilaalinta danaha qaranka iyo dhismaha wacyiga bulshada

Addis Ababa, Xoorreey 2/2018 (ENA): Gudoomiyaha Guddiga Joogtada ah ee Arrimaha Dimuqraasiyadda ee Golaha Wakiilada Shacabka, Ewnate Alane, ayaa sheegay in warbaahinta loo baahan yahay inay si xooggan ugu shaqeyso ilaalinta danaha qaranka iyo horumarinta wacyiga bulshada.

Warbaahinta waxaa la ogyahay inay door ballaaran ku leedahay horumarinta nidaamka dimuqraadiyadda, kor u qaadista hufnaanta iyo isla xisaabtanka, kobcinta wacyiga bulshada iyo xaqiijinta koboca dhaqaalaha, gaar ahaan iyada oo loo marayo faafinta xog sax ah iyo waxbaridda bulshada.

Ewnate Alane oo la hadlayay WWI ayaa sheegay in dalka gudihiisa ay ka socdaan tallaabooyin lagu xoojinayo dhaqanka dimuqraadiyadda, lagu dhisayo midnimada, laguna difaacayo danaha qaranka.

Wuxuu xusay in kala duwanaanshaha aragtiyaha iyo fikirka uu muhiim u yahay dhismaha dimuqraadiyadda, sidaas darteedna loo baahan yahay in warbaahinta loo abuuro jawi ku habboon oo u saamaxa inay kaalin wanaagsan ka qaadato hawshaas.

Si kastaba ha ahaatee, wuxuu tilmaamay in xogaha la gudbinayo ay tahay inaanay waxyeello u geysan danaha qaranka, isla markaana aanay dhaawacin midnimada iyo wadajirka shacabka.

Wuxuu carrabka ku adkeeyay in warbaahintu ay ku kala duwanaan karto mawduucyada ay tabinayso, laakiin ay waajib tahay inay ka taxadarto si fariimaha ay baahinayaan aysan u noqon kuwa hurin kara colaado ama abuuri kara khilaaf.

Ewnate Alane ayaa sheegay in guushii Adhwa ay tusaale u tahay sida dadka Itoobiya ay ugu midoobi karaan ilaalinta karaamada dalka iyo danaha qaranka, inkastoo ay jiraan kala duwanaanshiyo arrimo kale ah. Wuxuu ku boorriyay in mar kasta dalka la hormariyo.

Ugu dambayn, wuxuu cadeeyay in warbaahinta looga baahan yahay inay si weyn uga shaqeyso ilaalinta danaha qaranka iyo dhismaha wacyiga bulshada ee loo baahan yahay.

#WWI  #Wakaaladda_Wararka_Itoobiya