ቀጥታ፡

በምስራቅ ኦሮሚያ ዞን እስካሁን 620 ሺህ ኩንታል የበርበሬ ምርት ተሰበሰበ

ጭሮ፦ህዳር 10/2019 (ኢዜአ)  በምስራቅ ኦሮሚያ ዞን በበርበሬ ከለማው መሬት እስካሁን 620 ሺህ ኩንታል ምርት መሰብሰቡን የዞኑ ግብርናና ተፈጥሮ ሀብት ልማት ጽሕፈት ቤት ገለጸ።
 

በምስራቅ ኦሮሚያ ዞን የልማት ዘርፍ  አስተባባሪ እና የግብርና እና ገጠር ልማት ጽሕፈት ቤት ምክትል ኃላፊ አቶ አህመድ አቡበከር ለኢዜአ እንደገለጹት፣ በዞኑ በሚገኙ 36 ወረዳዎች ከ46 ሺህ ሄክታር በላይ መሬት ላይ የበርበሬ ልማት ተካሄዷል።

አብዛኛው ማሳ በበርበሬ ልማት  ኢኒሼቲቭ በክላስተር እንዲለማ መደረጉን ገልጸው፤ ይህም አርሶ አደሮች በተቀናጀ መንገድ  እንዲያለሙና ምርት በጋራ እንዲሰበሰቡ ማገዙን ተናግረዋል።

በልማቱ ከ987 ሺህ ኩንታል በላይ የበርበሬ ምርት ለማግኘት መታቀዱን ገልፀው፤ በእስካሁኑ እንቅስቃሴ 620 ሺህ ኩንታል ምርት መሰብሰቡን አመልክተዋል።

የቀረውን ምርት በወቅቱ ለመሰብሰብ አርሶ አደሮች ተቀናጅተው በጋራ  እየሰሩ መሆኑንም ምክትል ኃላፊው አብራርተዋል።

በዞኑ የበርበሬ ልማት ኢኒሼቲቭ ተግባራዊ ከተደረገ ወዲህ የአርሶ አደሮች የግብርና ቴክኖሎጂ አጠቃቀምና የቡድን ሥራ ባህል እያደገ መምጣቱንም ገልጸዋል።

ለአርሶ አደሮችም ከማሳ ዝግጅት አንስቶ እስከ ምርት አሰባሰብና አያያዝ ድረስ የባለሙያዎች ያልተቋረጠ ድጋፍ እየተደረገ መሆኑንም ገልጸዋል።

ይህም በሄክታር ይገኝ የነበረውን የበርበሬ ምርት ከ16 ወደ 22 ኩንታል ከፍ ለማድረግ ከፍተኛ አስተዋጽኦ ማበርከቱን አቶ አህመድ አስረድተዋል።

በዞኑ አብዛኛዎቹ ወረዳዎች የክረምት ዝናብ እጥረት በግብርና ልማቱ ላይ ተጽዕኖ ማሳደሩን አመልክተው፣ የምርት መቀነስን በበጋ መስኖ ለማካካስ በትኩረት እየተሰራ መሆኑንም አስታውቀዋል።

በምስራቅ ኦሮሚያ ዞን የበርበሬ ልማት በስፋት መካሄዱ፣ የአርሶ አደሮች በቡድን የመስራት አቅም መጠናከሩና የግብርና ቴክኖሎጂ አጠቃቀም መሻሻሉ ልማቱ እንዲስፋፋ እያደረገ እንደሚገኝም ተናግረዋል።

የኢትዮጵያ ዜና አገልግሎት
2015
ዓ.ም