የእንግሊዝ ፕሪሚየር ሊግ ተጠባቂ መርሐ ግብሮች

አዲስ አበባ፤ ጥቅምት 21/2019 (ኢዜአ)፦‎ የእንግሊዝ ፕሪሚየር ሊግ የዘጠነኛ ሳምንት መርሐ ግብር ዛሬ ይጀመራል።

በዕለቱ ስምንት ጨዋታዎች ይደረጋሉ።

ምሽት 12 ሰዓት ላይ ማንችስተር ሲቲ ከብራይተን በኢትሃድ ስታዲየም ይጫወታሉ።

ማንችስተር ሲቲ በ21 ነጥብ ሊጉን እየመራ ነው። ብራይተን በ16 ነጥብ ሶስተኛ ደረጃን ይዟል።

በስምንተኛ ሳምንት ማንችስተር ሲቲ በአስቶንቪላ 2 ለ 1፣ ብራይተን በሊቨርፑል የ2 ለ 0 ሽንፈት አስተናግደዋል።

ማንችስተር ሲቲ ካሸነፈ የሊጉን መሪነት የሚያጠናክር ሲሆን ከአርሰናል ጋር ያለውን የነጥብ ልዩነት ወደ ሶስት ከፍ ያደርጋል።

በሌላኛው መርሐ ግብር ቼልሲ ከማንችስተር ዩናይትድ ከቀኑ 9 ሰዓት ከ30 ላይ በስታምፎርድ ብሪጅ የሚያደርጉት ጨዋታ ተጠባቂ ነው።

ቼልሲ በ13 ነጥብ አምስተኛ ደረጃን ይዟል።  ማንችስተር ዩናይትድ በሰባት ነጥብ 16ኛ ደረጃ ላይ ይገኛል።

ባለሜዳው ቼልሲ በስምንተኛ ሳምንት በቶተንሃም ሆትስፐርስ 2 ለ 0 አሸንፏል።

ተጋጣሚው ማንችስተር ዩናይትድ ባለፉት ስድስት የሊግ ጨዋታዎች ከድል ርቋል።

ጨዋታው ጫና ውስጥ ለሚገኘው ዩናይትድ ወሳኝ የሚባል ነው።ቼልሲ ወደ አሸናፊነት ለመመለስ ይፋለማል።

በሌሎች መርሐ ግብሮች  ቶተንሃም ሆትስፐርስ ከክሪስታል ፓላስ ምሽት 2 ሰዓት ከ30 እና አስቶንቪላ ከፉልሃም ምሽት አምስት ላይ ይጫወታል።

ቦርንማውዝ ከሊድስ ዩናይትድ፣ ብሬንትፎርድ ከኖቲንግሃም ፎረስት፣ ሁል ሲቲ ከኤፕስዊች ታውን እና ኮቨንተሪ ሲቲ ከሰንደርላንድ በተመሳሳይ ምሽት 12 ሰዓት ላይ ጨዋታቸውን ያደርጋሉ።