የሊጉ መሪ ማንችስተር ሲቲ ከኤፕስዊች ታውን ጋር ይጫወታል

አዲስ አበባ፤ ጥቅምት 7/2019 (ኢዜአ):- የእንግሊዝ ፕሪሚየር ሊግ ሰባተኛ ሳምንት ዛሬ ይጀመራል።

በዕለቱ አምስት ጨዋታዎች ይደረጋሉ።

 

ከቀኑ 11 ሰዓት ማንችስተር ሲቲ ኤፕስዊች ታውንን በኢትሃድ ስታዲየም ያስተናግዳል።

ማንችስተር ሲቲ በሊጉ ያደረጋቸውን ስድስት ጨዋታዎች በማሸነፍ በ18 ነጥብ ሊጉን እየመራ ነው። በሊጉ ሁሉንም ጨዋታ ያሸነፈ ብቸኛ ክለብ ነው።

ተጋጣሚው ኤፕስዊች ታውን በዘጠኝ ነጥብ 10ኛ ደረጃ ላይ ይገኛል።

ባለሜዳው ማንችስተር ሲቲ ካሸነፈ መሪነቱን የሚያጠናክር ሲሆን ከአርሰናል ጋር ያለውን የነጥብ ልዩነት ወደ ስድስት ከፍ ያደርጋል።

በስድስተኛ ሳምንት መርሐ ግብር ፉልሃምን 2 ለ 1 በመርታት ወደ አሸናፊነት የተመለሰው አዲስ አዳጊው ኤፕስዊች ታውን ተከታታይ ድሉን ለማስመዝገብ ይፋለማል።

በሌላኛው መርሐ ግብር ኤቨርተን ከቼልሲ በሂል ዲኪንሰን ስታዲየም ከቀኑ 8 ሰዓት ከ30 ላይ ጨዋታቸውን ያደርጋሉ።

ኤቨርተን በ10 ነጥብ አምስተኛ ደረጃን ይዟል።

ተጋጣሚው ቼልሲ በተመሳሳይ 10 ነጥብ በግብ ክፍያ ተበልጦ ስድስተኛ ደረጃ ላይ ይገኛል።

ባለሜዳው ኤቨርተን ካለፉት አምስት የሊግ ጨዋታዎች ማሸነፍ የቻለው አንዱን ብቻ ነው።

ቼልሲ በስድስተኛ ሳምንት ቦርንማውዝን 5 ለ 1 በማሸነፍ ከሶስት ጨዋታዎች በኋላ ወደ ድል ተመልሷል።

ጨዋታው ኤቨርተን ወደ ድል ለመመለስ፣ ቼልሲ ተከታታይ ድሉን ለማስመዝገብ የሚያደርጉት ነው።

ብሬንትፎርድ ከሊቨርፑል ከቀኑ 11 ሰዓት በጂቴክ ኮሙኒቲ ስታዲየም የሚያደርጉት ጨዋታ ሌላኛው ትኩረት የሳበ መርሐ ግብር ሆኗል።

የለንደኑ ብሬንትፎርድ በ10 ነጥብ አራተኛ ደረጃ ላይ ይገኛል። ተጋጣሚው ሊቨርፑል በዘጠኝ ነጥብ ዘጠነኛ ደረጃን ይዟል።

ብሬንትፎርድ ካለፉት አምስት የሊግ ጨዋታዎች ድል የቀናው በአንዱ ብቻ ነው። ሊቨርፑል በስድስተኛ ሳምንት በሜዳው በማንችስተር ሲቲ የ3 ለ 0 ሽንፈት አስተናግዷል።

ሁለቱም ክለቦች ወደ አሸናፊነት ለመመለስ ይፋለማሉ።

በሌሎች መርሐ ግብሮች ፉልሃም ከሁል ሲቲ ከቀኑ 11 ሰዓት፣ ኒውካስትል ዩናይትድ ከአስቶንቪላ ምሽት 1 ሰዓት ከ30 ላይ ይጫወታሉ።