በምዕራብ ኦሮሚያ ዞን የቡና ጥራትና አቅርቦትን ለማሳደግ ትኩረት ተሰጥቷል

ነቀምቴ፤ ጥቅምት 6/2019 (ኢዜአ)፡- የቡና ጥራትን በማሻሻል ለማዕከላዊ ገበያ የሚቀርበውን የምርት መጠን ለማሳደግ ያለመ ሰፊ የማሻሻያ ስራ እየሰራ መሆኑን የምዕራብ ኦሮሚያ ዞን ግብርና ፅህፈት ቤት አስታወቀ።

የምዕራብ ኦሮሚያ ዞን ግብርና ፅህፈት ቤት ምክትል ኃላፊ ደረጄ ብርሃኑ(ዶ/ር) እንደገለጹት፤ ቡና በዞኑ በሰፊው የሚመረት ዋና የገቢ ምንጭ ቢሆንም፣ ደረጃውንና ጥራቱን የጠበቀ ምርት ለገበያ በማቅረብ ረገድ የሚታዩ ክፍተቶችን ለማረም እና ለማስተካከል ትኩረት ተሰጥቶ እየተሰራ ይገኛል።

 

ዞኑ በ2019 የምርት ዘመን ከ1 ሚሊዮን 130 ሺህ ኩንታል በላይ ቡና ለማምረት ማቀዱን እና ይህንን ግብ ለማሳካት የሚያስችሉ ዘመናዊ የአመራረትና የጥራት ማሻሻያ ስራዎች እየተከናወኑ እንደሚገኝ አስታውቋል።

ኃላፊው አያይዘውም የቡና ጥራትን ማረጋገጥና ምርቱን በእቅዱ መሠረት ለገበያ ማቅረብ የምርት መጠንን ከመጨመር ባለፈ፣ የአርሶ አደሩን ገቢ ለማሳደግና የሀገሪቱን የቡና ገበያ ለማጠናከር ከፍተኛ አስተዋጽኦ እንዳለው ገልጸዋል።

በዘርፉ እየተከናወነ ያለው የጥራት ማረጋገጥ ስራ ቡናን በጥንቃቄ በመሰብሰብ፣ ደረጃውን ጠብቆ በማድረቅ፣ እንደየጥራቱ በመለየት እና በአግባቡ በማሸግ ለገበያ ለማቅረብ የሚያስችል መሆኑን ገልጸዋል።

በዞኑ የጉቶ ጊዳ ወረዳ የቡና አምራች የሆኑት አርሶ አደር ምትኩ በላይ እንደገለጹት፤ የቡና ጥራትን ለማሻሻል የተሻሉ የአመራረት እና የድህረ-ምርት አያያዝ ልምዶችን መተግበር ወሳኝ በመሆኑ ከግብርና ባለሙያዎች ባገኙት ምክር ሰፊ ስራዎችን እየከወኑ ይገኛሉ።

ቡናን በተገቢው የእድገት ወቅት በጥንቃቄ መሰብሰብና በስርዓት ማድረቅ ለገበያ የሚቀርበውን ምርት ዋጋና ተፈላጊነት ከፍ እንደሚያደርገው በመገንዘባቸውም በጥራት ላይ ትኩረት አድርገው በመስራት የተሻለ ገቢ ለማግኘት እየተጉ እንደሚገኙ ገልጸዋል።

ሌላው በዞኑ የሚገኙት አርሶ አደር አቶ ያሲን ወርቁ በበኩላቸው፣ የቡና ጥራትን በመጠበቅና ምርቱን በተደራጀ አሰራር ለገበያ ማቅረብ የአምራቾችን ገቢ ለማሳደግ ወሳኝ መሆኑን ገልጸዋል።

አርሶ አደሮች በቡና ጥራት ማሻሻያ ስራዎች ላይ በንቃት መሳተፍ እንዳለባቸውና ከግብርና ባለሙያዎች የሚያገኙትን ሙያዊ ምክር በመተግበር የምርታቸውን ጥራትና ገቢያቸውን ማሳደግ እንደሚችሉ መገንዘባቸውንም ተናግረዋል።

አርሶ አደሩ ባላቸው ከ1 ሄክታር በላይ መሬት ላይ የቡና ችግኞች በማልማት ከ40 ኩንታል በላይ ምርት ለማዕከላዊ ገበያ ለማቅረብ አቅደው እየሰሩ ይገኛሉ።