የአውሮፓ ሻምፒዮንስ ሊግ የሁለተኛ ዙር መርሐ ግብር ዛሬ ይጀመራል

አዲስ አበባ፤ ጥቅምት 3/2019 (ኢዜአ)፦ በአውሮፓ ሻምፒዮንስ ሊግ የሊግ ምዕራፍ (League Phase) ዛሬ ዘጠኝ ጨዋታዎች ይካሄዳሉ።

ምሽት አራት ሰዓት ላይ አርሰናል በኤምሬትስ ስታዲየም የፈረንሳዩን ክለብ ሊል ያስተናግዳል።

የባለፈው የውድድር ዓመት የፍጻሜ ተፈላሚ አርሰናል በመጀመሪያ ጨዋታው ናፖሊን 1 ለ 0 አሸንፏል።

ተጋጣሚው ሊል በበኩሉ በሪያል ቤቲስ የ3 ለ 2 ሽንፈት አስተናግዷል።

ባለሜዳው አርሰናል ተከታታይ ድሉን ለማስመዝገብ ይጫወታል።

በሌላኛው መርሐ ግብር አትሌቲኮ ማድሪድ ከማንችስተር ዩናይትድ ምሽት አራት ሰዓት ላይ በዋንዳ ሜትሮፖሊታኖ ስታዲየም ይጫወታሉ።

አትሌቲኮ ማድሪድ በመጀመሪያ ጨዋታው በሊቨርፑል የ2 ለ 1 ሽንፈት አስተናግዷል። ማንችስተር ዩናይትድ የአዘርባጃኑን ሳባህን 4 ለ 0 ረትቷል።

ጨዋታው ተመጣጣኝ ፉክክር ይታይበታል ተብሎ ይጠበቃል።

ጋላታሳራይ ከባርሴሎና ምሽት አራት ሰዓት ላይ በራምስ ፓርክ ጨዋታቸውን ያደርጋሉ።

በመጀመሪያ መርሐ ግብር ጋላታሳራይ በስፖርቲንግ ሊዝበን የ3 ለ 1 ሽንፈት ሲቀምስ ባርሴሎና ፌይኖርድን 5 ለ 1 አሸንፏል።

የኖርዌይ ቫይኪንግ ባየር ሙኒክን ምሽት አራት ሰዓት ላይ በላይስ አሬና ያስተናግዳል።

ቫይኪንግ በመጀመሪያ ጨዋታው በስቱትጋርት 3 ለ 1 ተሸንፏል። ተጋጣሚው ባየር ሙኒክ የኖርዌውን ቦዶ ግሊምት 5 ለ 0 በሆነ ሰፊ የግብ ልዩነት ማሸነፉ አይዘነጋም።

የስድስት ጊዜ የውድድሩ አሸናፊ ባየር ሙኒክ በሁለተኛው ጨዋታ ሌላኛውን የኖርዌይ ክለብ ይገጥማል።

ኢንተር ሚላን ከክለብ ብሩዥ፣ ቪያሪያል ከናፖሊ እና አርቢ ላይፕዚግ ከፒኤስቪ አይንድሆቨን በተመሳሳይ ከምሽቱ አራት ሰዓት ላይ ጨዋታቸውን ያከናውናሉ።

ሌንስ ከስፖርቲንግ ሊዝበንና ሳባህ ከስላቪያ ፕራግ በተመሳሳይ ምሽት 1 ሰዓት ከ45 ላይ ይጫወታሉ።