በትግራይ ተቋርጦ የቆየው የትጥቅ ማስፈታትና ወደ ሰላማዊ ሕይወት የመመለስ ሂደት (DDR) እንደገና ተጀመረ

አዲስ አበባ፤ጥቅምት 2 /2019(ኢዜአ)፦ከታጠቁ ኃይሎች በመውጣት ወደ ሰላማዊ ሕይወት መመለስ የሚፈልጉ ወጣቶች በመቀሌ እየተመዘገቡ እንደሚገኙ ተገለጸ።

በትግራይ ክልል ተቋርጦ የቆየው የትጥቅ ማስፈታት፣ ከታጠቁ ኃይሎች መውጣትና ወደ ሰላማዊ ሕይወት መመለስን ያካተተው የDDR ሂደት እንደገና መጀመሩ ተሰምቷል።

በሂደቱ መቀጠል፣ ከጦርነት ወጥተው ወደ ሰላማዊ ኑሮ መመለስ የሚፈልጉ ታጣቂዎች የቀረበላቸውን የሰላም ጥሪ ተቀብለው በመቀሌ በሚገኘው የትግራይ ፖሊስ ኮሚሽን የምዝገባ ማዕከል በመቅረብ እየተመዘገቡ መሆኑ ተገልጿል።

በምዝገባው ሂደት ከሚሳተፉ አንዳንድ የታጠቁ ወጣቶች እንደገለጹት፣ በአካባቢያቸው ለሚገኙ የኢትዮጵያ መከላከያ ሠራዊት ክፍሎች መሣሪያዎቻቸውን ካስረከቡ በኋላ ወደ መቀሌ በመምጣት ለምዝገባ ቀርበዋል።

የDDR ሂደቱ እንደገና መጀመሩ፣ በጦርነት ምክንያት በአስቸጋሪ ሁኔታ ውስጥ የሚገኙ ታጣቂዎች ከወታደራዊ ኑሮ በመውጣት የተረጋጋ ማኅበራዊና ኢኮኖሚያዊ ሕይወት እንዲመሠርቱ አዲስ ዕድል የሚፈጥር መሆኑ ተገልጿል።

የብሔራዊ ተሃድሶ ኮሚሽን ኃላፊዎች በበኩላቸው፣ በተለይም በቀደመው ግጭት ምክንያት ለችግር የተጋለጡ የትግራይ ወጣቶች ተስፋ ሳይቆርጡ፣ ወደ ሰላማዊ ሕይወት ለመመለስ የሚያስችሏቸውን አማራጮች እንዲጠቀሙና የወደፊት ሕይወታቸውን እንደገና እንዲገነቡ ጥሪ ማቅረባቸው ይታወሳል።

የDDR ሂደቱ ዋና ዓላማ ታጣቂዎች ከታጠቁ ኃይሎች በመውጣት ወደ መደበኛ ማኅበራዊ ኑሮ እንዲመለሱ፣ በሰላም ግንባታና በልማት ሥራዎች እንዲሳተፉ ማስቻል ነው። ይህንን ዓላማ ለማሳካት የኢትዮጵያ መንግሥት፣ የተለያዩ ተቋማትና ዓለም አቀፍ አጋር ድርጅቶች ቅንጅትና ድጋፍ ወሳኝ እንደሆነ ተጠቁሟል።

በምዝገባው ወቅት ያነጋገርናቸው አንዳንድ ታጣቂዎች  የDDR ሂደቱ እንደገና መጀመሩ ከታጠቀ ኑሮ ወደ ሰላማዊ ሕይወት ለመሸጋገር አስፈላጊ እርምጃ መሆኑን ገልጸዋል።

በተያያዘም የብሔራዊ ተሃድሶ ኮሚሽን በመቀሌ በሚገኙት የትግራይ ፖሊስ ኮሚሽንና የሰሜን እዝ ማዕከል በመቅረብ እንዲመዘገቡ ለሚፈልጉ ታጣቂዎች ጥሪ ማቅረቡ ተገልጿል።