ጠቅላይ ሚኒስትር ዐቢይ አሕመድ (ዶ/ር) ለመስቀል በዓል የእንኳን አደረሳችሁ መልዕክት አስተላለፉ

አዲስ አበባ፤ መስከረም 16/2019 (ኢዜአ)፦ ጠቅላይ ሚኒስትር ዐቢይ አሕመድ (ዶ/ር) ለመስቀል በዓል የእንኳን አደረሳችሁ መልዕክት አስተላልፈዋል።

ጠቅላይ ሚኒስትሩ በማህበራዊ ትስስር ገጻቸው ባስተላለፉት መልዕክት ፤የመስቀል በዓል ሃይማኖታዊና ባህላዊ በሆነ መንገድ በመላው ኢትዮጵያ የሚከበር በዓል መሆኑን ገልጸዋል።

በዓሉ ቤተሰባዊ እና ማኅበራዊ ቀለም አለው፤ ቤተሰብ ይገናኝበታል ፤ ሠፈሩ ይሰባሰብበታል፤ ከተማውና አካባቢው ወደ አንድ አደባባይ ይተምበታል ብለዋል።

ከእንጨት እስከ ደመራ ያለው መሰባሰብም የመደመርን ኃይል የሚያሳይ ተምሳሌት ነው ሲሉም ገልጸዋል።

በዓሉን በምናከብርበት ጊዜ ሁሉ የኢትዮጵያን ዐቅሞች እያሰባሰብንና እየደመርን ታላቅ ሀገራዊ ዐቅም ለመፍጠር እንትጋ ያሉት ጠቅላይ ሚኒስትሩ መልካም በዓል ይሁን በማለትም መልዕክታቸውን አስተላልፈዋል።