መንግስት ለማዕድን ዘርፍ በሰጠው ትኩረት በድንጋይ ከሰል ዘርፍ ውጤታማ ሥራ እንድናከናውን ምቹ ሁኔታ ተፈጥሮልናል

አዲስ አበባ፤ መስከረም 11/2019 (ኢዜአ)፦መንግስት ለማዕድን ዘርፍ በሰጠው ትኩረትና ድጋፍ በድንጋይ ከሰል ዘርፍ ውጤታማ ሥራ እንዲያከናውን ምቹ ሁኔታ እንደፈጠረለት ዮ ሆልዲንግ ንግድና ማኑፋክቸሪንግ የተሰኘ ሀገር በቀል ኩባንያ አስታወቀ።

የተለያዩ የመገናኛ ብዙኃን ተቋማት እና የማህበራዊ ሚዲያ ተጽዕኖ ፈጣሪዎች በደቡብ ኢትዮጵያ ክልል ጋሞ ዞን ቦረዳ ወረዳ የሚገኘውን ዮ ሆልዲንግ የድንጋይ ከሰል ማምረቻና ማጠቢያ ፋብሪካ የሥራ እንቅስቃሴን ጎብኝተዋል።

ዮ ሆልዲንግ የድንጋይ ከሰል ማምረቻና ማጠቢያ ፋብሪካ ዋና ሥራ አስፈጻሚ መኳንንት አለሙ እንደገለጹት፤ ኩባንያው በቤንሻንጉል ጉሙዝ እና በደቡብ ኢትዮጵያ ክልሎች 2 የድንጋይ ከሰል ማጠቢያ ፋብሪካዎችን ገንብቶ እየሠራ ይገኛል።  

 

‎የድንጋይ ከሰል ማጠቢያ ፋብሪካዎቹ በሰዓት 400 ቶን የታጠበ የድንጋይ ከሰል በማምረት የሀገሪቱን ትላልቅ ኩባንያዎች የግብዓት አቅርቦት ችግር እየፈቱ ይገኛሉ ብለዋል። 

‎ኩባንያው በደቡብ ኢትዮጵያ ክልል ጋሞ ዞን ቦረዳ ወረዳ በሚገኘው ዮ ሆልዲንግ የድንጋይ ከሰል ማምረቻና ማጠቢያ ፋብሪካው ብቻ በአዲሱ በጀት ዓመት በሁለት ወራት ውስጥ ከ2 መቶ ሺህ ቶን በላይ የድንጋይ ከሰል በማጠብ ለገበያ ለማቅረብ ዝግጁ ማድረጉን አስታውቀዋል። 

‎በዚህም ፋብሪካዎቹ የድንጋይ ከሰል ሀብትን በዘመናዊ ቴክኖሎጂ በማበልጸግ ለሀገር ውስጥ ኢንዱስትሪዎች አስተማማኝ የኃይል ግብዓት እያቀረቡ ይገኛሉ ብለዋል።  

‎‎ዮ ሆልዲንግ በያዝነው ዓመት በሁለት የተለያዩ የሀገራችን አካባቢዎች ሁለት ግዙፍ የከሰል ማጠቢያ ፋብሪካዎችን ለመገንባት በዝግጅት ላይ የሚገኝ መሆኑን አስታውቀዋል።

 

‎የሀገር ውስጥ የምርት ፍላጎትን ሙሉ በሙሉ በመቅረፍ ወደ ውጭ ሀገራት ምርቱን ኤክስፖርት ለማድረግ እየሠራ መሆኑን ገልጸዋል።

‎ኩባንያው የሚያመርተው ከፍተኛ ጥራት ያለው የታጠበ የከሰል ምርት የፋብሪካዎችን የኃይል ፍላጎት በማሻሻል የነዳጅ ፍጆታን እና የምርት ወጪን እየቀነሰ እንደሆነ አመልክተዋል።

‎ኢትዮጵያ በየዓመቱ ለድንጋይ ከሰል ግዥ የምታወጣውን ከፍተኛ የውጭ ምንዛሬ ለማስቀረት ኩባንያው ከፍተኛ ሚና እየተጫወተ መሆኑን አስታውቀዋል።

‎ይህም የሀገሪቱን የኢንዱስትሪ ልማት፣ የኢኮኖሚ ዕድገት እና የውጭ ምንዛሬ ግኝት በማሳደግ ረገድ የጎላ ሚና እንደሚጫወት ገልጸዋል።

‎መንግስት ለማዕድን ዘርፍ የሰጠው ትኩረትና ድጋፍ በድንጋይ ከሰል ዘርፍ ውጤታማ ሥራ እንዲያከናውን ምቹ ሁኔታ እንደፈጠረለት ዋና ስራ አስፈጻሚው አስታውቀዋል።

‎የፋብሪካው ስራ አስኪያጅ ኤፍሬም ታደሰ በበኩላቸው፤ ፋብሪካው ለበርካታ ወገኖች ቋሚና ጊዜያዊ የሥራ ዕድል እየፈጠረ መሆኑን ተናግረዋል። 

በተለያዩ ማህበራዊ አገልግሎቶች ላይ በመሳተፍም የድርሻውን እየተወጣ እንደሚገኝ ገልጸዋል።