የዕለቱ ተጠባቂ ጨዋታዎች: አርሰናል ከሰንደርላንድ፣ ቼልሲ ከሁል ሲቲ እና ሊቨርፑል ከፉልሃም

አዲስ አበባ ፤ መስከረም 2/2019 (ኢዜአ)፦ የእንግሊዝ ፕሪሚየር ሊግ አራተኛ ሳምንት መርሐ ግብር ዛሬ ይጀመራል።

በዕለቱ ሰባት ጨዋታዎች ይደረጋሉ።

ምሽት አራት ሰዓት ላይ ሰንደርላንድ ከአርሰናል በስታዲየም ኦፍ ላይት ይጫወታሉ።

ባለሜዳው ሰንደርላንድ ከሶስት ጨዋታዎች አራት ነጥብ በመሰብሰብ 12ኛ ደረጃን ይዟል።

የወቅቱ የሊጉ ሻምፒዮን አርሰናል ሶስቱንም ጨዋታዎች በማሸነፍ በዘጠኝ ነጥብ ሁለተኛ ደረጃን ይዟል።

ሁለቱ ክለቦች በሊጉ ሲገናኙ የአሁኑ ለ35ኛ ጊዜ ነው።

ከዚህ ቀደም ባደረጓቸው 34 ጨዋታዎች አርሰናል 20 ጊዜ በማሸነፍ የበላይነቱን ይዟል። ሰንደርላንድ ያሸነፈው በሶስት አጋጣሚዎች ነው። በቀሪ 11 ጨዋታዎች አቻ ተለያይተዋል።

ሰንደርላንድ አርሰናልን ለመጨረሻ ጊዜ በሊጉ ያሸነፈው እ.አ.አ በ2009 ነው። 

አርሰናል ዛሬ ካሸነፈ የሊጉን መሪነት ከማንችስተር ሲቲ ይረከባል።

ሁለቱ ቡድኖች ባለፈው የውድድር ዓመት በስታዲየም ኦፍ ላይት ባደረጉት የሊግ ጨዋታ ሁለት አቻ መለያየታቸው የሚታወስ ነው።

 

በሌላኛው መርሐ ግብር ቼልሲ በስታምፎርድ ብሪጅ ስታዲየም ሁል ሲቲን ከቀኑ 11 ሰዓት ላይ ያስተናግዳል።

ቼልሲ በስድስት ነጥብ አራተኛ ደረጃን ይዟል። በሶስተኛ ሳምንት መርሐ ግብር በአርሰናል የ2 ለ 1 ሽንፈት አስተናግዷል።

አዲስ አዳጊው ሁል ሲቲ ከሶስት ጨዋታዎች ሰባት ነጥብ በመሰብሰብ ሶስተኛ ደረጃ ላይ ተቀምጧል። 

ባለሜዳው ቼልሲ ከሽንፈቱ በማገገም ወደ አሸናፊነት መንገድ ለመመለስ ይጫወታል። 

በአንጻሩ በሊጉ ጠንካራ ጅማሮ ያደረገው ሁል ሲቲ ለተጋጣሚው ፈተና ይሆናል ተብሎ ይጠበቃል።

ሊቨርፑል ከፉልሃም ከቀኑ 11 ሰዓት ላይ በአንፊልድ ሮድ ስታዲየም ጨዋታቸውን ያከናውናሉ።

 

ከሶስት የሊግ ጨዋታዎች አምስት ነጥብ ያገኘው ሊቨርፑል በአምስት ነጥብ ስድስተኛ ደረጃን ይዟል። በሶስተኛ ሳምንት ኤፕስዊች ታውንን 2 ለ 0 በመርታት የመጀመሪያ ድሉን አሳክቷል።

በአንጻሩ በሶስቱም የሊጉ ጨዋታዎች ሽንፈት ያስተናገደው ፉልሃም ያለ ምንም ነጥብ 19ኛ ደረጃን ይዞ ወራጅ ቀጠና ውስጥ ይገኛል።

ጨዋታው ሊቨርፑል ተከታታይ ድሉን ለማስመዝገብ ፉልሃም የመጀመሪያ ሶስት ነጥቡን ለማግኘት የሚያደርጉት ነው።

አስቶንቪላ ከኖቲንግሃም ፎረስት፣ ክሪስታል ፓላስ ከኤፕስዊች ታውንና ቦርንማውዝ ከብሬንትፎርድ በተመሳሳይ 11 ሰዓት ላይ ጨዋታቸውን ያደርጋሉ።

ምሽት 1 ሰዓት ከ30 ላይ ቶተንሃም ሆትስፐርስ ከኤቨርተን በቶተንሃም ሆትስፐርስ ስታዲየም ይጫወታሉ።