ጠቅላይ ሚኒስትር ዐቢይ አሕመድ (ዶ/ር) ለአዲሱ ዓመት ባስተላለፉት የእንኳን አደረሳችሁ መልዕክት ያነሷቸው ዋና ዋና ነጥቦች፡-

ዘመን በፈጣሪ የተሰጠ የመሥሪያ መጽሐፍ በመሆኑ፤ ትናንት የጻፍናቸውን የውድቀትና የድል ታሪኮች በማስታወስ ዛሬ ላይ ሆነን የተሻለ ጽሑፍ መጻፍ ይገባል።

በግብርና (በበጋ ስንዴና ሌማት)፣ በኢኮኖሚ፣ በአረንጓዴ ልማት እና በግዙፍ ፕሮጀክቶች እየታዩ ያሉ ስኬቶች የኢትዮጵያን የነገ ብልጽግና እያረጋገጡ ናቸው።

የጠላት ሟርት ከሽፎ ሕዝቡ በባለቤትነት በተሳተፈበት ሀገራዊ ምክክር ሰፊ መግባባት ላይ መደረሱ እና ለዚህም ማሳያ የሚሆን የታራሚዎች የምሕረት ይቅርታ ተደርጓል።

የጉልበትና የጠመንጃ ጊዜ አብቅቶ የብዕር፣ የሐሳብና የሰላም ጊዜ በመተካቱ ቀጣዩ የኢትዮጵያ ምዕራፍ በንግግርና በመግባባት ላይ የተመሠረተ ይሆናል።

ሀገራዊ ምክክሩ ልሂቃን ብቻ የሚደራደሩበት ሳይሆን ገበሬው፣ አርብቶ አደሩ፣ ወጣቱና ሴቱ በቀጥታ ተሳትፈው የሀገራቸውን ዕጣ ፈንታ በባለቤትነት የወሰኑበት ታሪካዊ ምዕራፍ ሆኗል።

የኢነርጂ አቅምን ከማሳደግ ባለፈ ዲጂታል 2030ን ስኬታማ በማድረግ ረገድ የተጀመሩ ሥራዎች የሀገሪቱን የቴክኖሎጂና የኢኮኖሚ አድማስ እያሰፋ ነው።

የቢሾፍቱ ግዙፍ አየር ማረፊያ ፕሮጀክት እና የኮሪደር ልማቶች የኢትዮጵያን ሀብት፣ ገጽታና ውበት ለዓለም እያስተዋወቁ ናቸው።

የኢትዮጵያ የብልጽግና እና የሰላም ጉዞ ስኬት የተሳካ እንዲሆን የፖለቲካ ፓርቲዎች፣ የጸጥታ ተቋማት፣ የሃይማኖት አባቶች፣ ሚዲያዎች እና የሲቪል ሰርቫንቱ የተቀናጀ ተሳትፎ ወሳኝ ነው።

የኢትዮጵያ የባሕር በር አጀንዳ ዓለም አቀፋዊ ተቀባይነትን አግኝቶ የሀገሪቱን የተጽዕኖ አድማስ እያሰፋው መጥቷል።

አዲሱ ዓመት የፖለቲካ ምኅዳሩ ሰፍቶ፣ ኅብረ ብሔራዊ አንድነቱ የጸና እና ምርታማነቱ በዓይነትና በጥራት የጨመረበት የብልጽግና ትውልድ መገንቢያ ዘመን እንዲሆን ታቅዷል።

በምክክሩ የተግባባንባቸው ሐሳቦች ባህል፣ ሥርዓት፣ አሠራር፣ ዐዋጅ እና ሕገ መንግሥታዊ ማሻሻያ ሆነው መሬት ላይ ወርደዋል።

በአዲስ ዓመት ዋዜማ በምሕረት የተፈቱ ታራሚዎች ካለፈው ተምረው በሀገር ሰላምና ልማት ላይ አዎንታዊ አስተዋጽኦ ያደርጉ ዘንድ ማኅበረሰቡ ሊደግፋቸው ይገባል።

የተደረጉ የማክሮ ኢኮኖሚ ማሻሻያዎች የዘመናትን የኢኮኖሚ ስብራት በመጠገን የምርትና የወጪ ንግድ ጭማሪን እያመጡ ነው።

በ"ኢትዮጵያ ታምርት" ንቅናቄ ማኑፋክቸሪንግን እየገነባ ሲሆን፣ የሀገር ውስጥ የመድኃኒት ማምረት አቅምም እያደገ መጥቷል።

የወንዝ ዳርቻ ልማቶች አፈርን፣ ከተማዎችን፣ የውኃ ሀብትን እና ጤናን በአንድ ላይ እየጠበቁ ነው።

የማዕድን ፍለጋ፣ ምርትና ሽያጭ እንቅስቃሴዎች ከቀድሞው የተሻለ አፈጻጸም እያሳዩ ነው።