ማንችስተር ሲቲ ኮቨንተሪ ሲቲን በማሸነፍ በሊጉ መሪነት ቀጥሏል

አዲስ አበባ፤ ነሐሴ 30/2018 (ኢዜአ):- በእንግሊዝ ፕሪሚየር ሊግ የሶስተኛ ሳምንት መርሐ ግብር ማንችስተር ሲቲ ኮቨንተሪ ሲቲን 1 ለ 0 አሸንፏል።

በኢትሃድ ስታዲየም በተካሄደው ጨዋታ አርሊንግ ሃላንድ በ26ኛው ደቂቃ ግቧን አስቆጥሯል።

የ26 ዓመቱ አጥቂ በውድድር ዓመቱ ያስቆጠራቸውን ጎሎች ብዛት ሶስት አድርሷል።

ባለሜዳው ማንችስተር ሲቲ በጨዋታው ላይ በተጋጣሚው ተፈትኗል።

ተጋጣሚው ኮቨንተሪ ሲቲ ግብ ሊያስቆጥርባቸው የሚችልባቸውን ግልጽ እድሎችን አምክኗል።

በ125 ሚሊዮን ፓውንድ ከቼልሲ ወደ ማንችስተር ሲቲ የተዘዋወረው ኤንዞ ፈርናንዴዝ በቋሚ አሰላለፍ ውስጥ በመግባት የመጀመሪያ ጨዋታውን አድርጓል።

ውጤቱን ተከትሎ ማንችስተር ሲቲ በዘጠኝ ነጥብ በመሪነነቱ ቀጥሏል።
ሶስተኛ ተከታታይ ሽንፈቱን ያስተናገደው ኮቨንተሪ ሲቲ ያለ ምንም ነጥብ 19ኛ ደረጃን ይዞ ወራጅ ቀጠና ውስጥ ይገኛል።

በአራተኛ ሳምንት ማንችስተር ሲቲ ከከተማ ተቀናቃኙ ማንችስተር ዩናይትድ ጋር የሚያደርገው የደርቢ ጨዋታ ከወዲሁ ተጠባቂ ነው።

ኮቨንተሪ ሲቲ ከብራይተን ጋር የሚጫወት ይሆናል።

በሌሎች መርሐ ግብሮች ክሪስታል ፓላስ ፉልሃምን 3 ለ 2 አሸንፏል።

ብሬንትፎርድ ከሰንደርላንድ፣ ብራይተን ከሊድስ ዩናይትድ በተመሳሳይ አንድ አቻ ተለያይተዋል።

ኖቲንግሃም ፎረስት እና ቶተንሃም ሆትስፐርስ ያለ ግብ በአቻ ውጤት ተጠናቋል።

ምሽት 1 ሰዓት ከ30 ላይ ሁል ሲቲ ከአስቶንቪላ በኤምኬኤም ስታዲየም ጨዋታቸውን ያደርጋሉ።