ማንችስተር ሲቲ ከቦርንማውዝ፣ ኒውካስትል ከሊቨርፑል፡ ማን ያሸንፋል?

አዲስ አበባ፤ ነሐሴ 17/2018 (ኢዜአ)፦ የእንግሊዝ ፕሪሚየር ሊግ የመጀመሪያ ሳምንት መርሃ ግብር ዛሬም ቀጥሎ ይካሄዳል።

ከቀኑ 10 ሰዓት ማንችስተር ሲቲ ከቦርንማውዝ በኢትሃድ ስታዲየም ጨዋታቸውን ያደርጋሉ።

ከአሰልጣኝ ፔፕ ጋርዲዮላ የ10 ዓመታት ስኬታማ ቆይታ በኋላ፣ ማንችስተር ሲቲ በኤንዞ ማሬስካ አዲስ ምዕራፍ ይጀምራል።

የ46 ዓመቱ ጣልያናዊ የመጀመሪያ የውድድር ጨዋታቸውን ዛሬ ከቦርንማውዝ ጋር ያደርጋሉ።

በአንጻሩ አንዶኒ ኢራኦላን ወደ ሊቨርፑል የሸኘው ቦርንማውዝ የ49 ዓመቱ ጀርመናዊ ማርኮ ሮስን በአሰልጣኝነት መሾሙ ይታወቃል።

ቦርንማውዝ ከባለፈው የውድድር ዓመት የቀጠለውን በሊጉ የ18 ጨዋታዎች ያለመሸነፍ አስደናቂ ጉዞ ለማስጠበቅ ወደ ሜዳ ይገባል።

ሁለቱ ቡድኖች ባለፈው የውድድር ዓመት በ37ኛው ሳምንት ያደረጉት ጨዋታ በአንድ አቻ ውጤት መጠናቀቁ ይታወሳል።

ይህም የማንችስተር ሲቲን የዋንጫ ፉክክር ያበቃና የአርሰናልን የሊግ ሻምፒዮንነት ያረጋገጠ ነበር።

ጨዋታው ጠንካራ ፉክክር ይታይበታል ተብሎ ይጠበቃል።

በሌላኛው መርሃ ግብር ኒውካስትል ዩናይትድ ከሊቨርፑል ምሽት 12 ሰዓት ከ30 ላይ በሴንት ጀምስ ፓርክ ስታዲየም ይጫወታሉ።

ኒውካስትል ዩናይትድ ባለፈው የውድድር ዓመት በ49 ነጥብ 12ኛ ደረጃን ይዞ ማጠናቀቁ የሚታወስ ነው።

ተጋጣሚው ሊቨርፑል በ60 ነጥብ አምስተኛ ደረጃን ይዞ ጨርሷል።

ሁለቱ ቡድኖች አምና ጥሩ የሚባል ጊዜ አላሰለፉም። ይህን ተከትሎም ሊቨርፑል አርን ስሎትን፣ ኒውካስትል ዩናይትድ ኤዲ ሃውን አሰንብተዋል።

ሊቨርፑል አንዶኒ ኢራኦላን በአሰልጣኝነት ሲሾም ኒውካስትል ማቲያስ ጃይስልን ቀጥሯል።

ቡድኖቹ አዲሱን የውድድር ዓመት በአዲስ አሰልጣኝ ይጀምራሉ።

ብራይተን ከአስቶንቪላ ከቀኑ 10 ሰዓት በአሜክስ ስታዲየም ጨዋታቸውን ያደርጋሉ።

ባለፈው የውድድር ዓመት ብራይተን በ53 ነጥብ ስምንተኛ፣ አስቶንቪላ በ65 ነጥብ አራተኛ ደረጃን ይዘዋል።

የወቅቱ የዩሮፓ ሊግ አሸናፊ አስቶንቪላ በሊጉ የመጀመሪያ ጨዋታ ጠንካራ ፈተና እንደሚገጥመው ይጠበቃል።

ብራይተን ዓመቱን በድል ለመጀመር ይጫወታል።