ዲጂታል 2030፦የኢትዮጵያ አዲሱ የቴክኖሎጂ ዘመን!

የዲጂታል 2025 መጠናቀቁን ተከትሎ ጠቅላይ ሚኒስትር ዐቢይ አሕመድ (ዶ/ር) የዲጂታል ኢትዮጵያ 2030 ስትራቴጂን ታኅሣሥ 11 ቀን 2018 ዓ.ም በአዲስ ዓለም አቀፍ ኮንቬንሽን ማዕከል ይፋ ማድረጋቸው ይታወቃል።

ይህ አዲስ ምዕራፍ ሀገሪቱ ባለፉት አምስት ዓመታት በዲጂታል ዘርፉ ያስመዘገበቻቸውን ስኬቶች አጠናክሮ ለመቀጠል የተዘጋጀ ታላቅ አገራዊ እቅድ ነው።

ጠቅላይ ሚኒስትሩ በወቅቱ ባስተላለፉት መልዕክት ኢትዮጵያ በቴክኖሎጂው ዓለም ተመልካች ሳይሆን ተሳታፊና መሪ ትሆናለች ሲሉ ገልጸዋል።ተደራሽነትን ማስፋት፣እኩል እድል መፍጠር እና በዜጎችና ተቋማት መካከል መተማመንን ማጎልበት የስትራቴጂው ቁልፍ ትልሞች ናቸው ብለዋል።

ኢትዮጵያ በዓለም ሁለተኛውና ለአፍሪካ የመጀመሪያው የሚሆነውን የሰው ሰራሽ አስተውሎት (AI) ዩኒቨርሲቲ ግንባታ በይፋ አስጀምራለች። ይህ ዩኒቨርሲቲ ሀገሪቱን በዘርፉ በዓለም አቀፍ ደረጃ ተወዳዳሪ የሚያደርግና የላቀ የኤአይ ባለሙያዎችንና ተመራማሪዎችን የሚያፈራ ታሪካዊ ተቋም ይሆናል።

ይህ ታላቅ የትምህርት ተቋም ከሀገር ውስጥ አልፎ ለሌሎች የአፍሪካ ሀገራት ተማሪዎች ነፃ የትምህርት ዕድል (Scholarship) በማመቻቸት፣ ኢትዮጵያን የአህጉሪቱ የቴክኖሎጂና የፈጠራ ማዕከል (Innovation Hub) የማድረግ ራዕይን በግንባር ቀደምትነት የሚያስፈጽም ይሆናል።

በቅርቡ በተባበሩት መንግሥታት የልማት ፕሮግራም (UNDP) እና በአዲስ አበባ ዩኒቨርሲቲ አጋርነት የተመረቀው 'AI UniPod' ማዕከል፣ ወጣቶች በሮቦቲክስ፣ በዳታ ሳይንስና በኤአይ ምርምሮች ላይ እንዲሰማሩ ትልቅ የቴክኖሎጂ መሠረተ ልማት ፈጥሯል።

አዲሱ ስትራቴጂ የፋይዳ ዲጂታል መታወቂያን ከሁሉም ማህበራዊና ኢኮኖሚያዊ አገልግሎቶች ጋር በማቀናጀት ቀልጣፋ አሰራርን መፍጠርን ያለመ ነው። ይህም ቢሮክራሲን በመቀነስ ለዜጎች ፈጣንና ደረጃውን የጠበቀ አገልግሎት ለመስጠት ያስችላል።

በተጨማሪም በሚሊዮን የሚቆጠሩ የዲጂታል ስራ እድሎችን ለወጣቶች ማመቻቸት እና የወጣቶችን የፈጠራ አቅም ወደ ኢኮኖሚያዊ ጥቅም መቀየር የስትራቴጂው ዋና ግብ ነው።

የዲጂታል ኢኮኖሚው ሲያድግ የመረጃ ደህንነት ወሳኝ በመሆኑ፣ የሳይበር ደህንነት መሠረተ ልማቶችን ማጠናከር የዚሁ ዕቅድ ዋነኛ አካል ተደርጎ ተይዟል። ይህም የዜጎችንና የተቋማትን የመረጃ ደህንነት በአስተማማኝ ሁኔታ ለመጠበቅ የሚያስችል አቅም ይፈጥራል።

ትልሞቹ እንዲሳኩም በተለይ የህዝብ ዲጂታል መሠረተ ልማት ማስፋት ላይ ትልቅ ስራ እንደሚከናወን ተጠቁሟል። ይህም ዲጂታል ቴክኖሎጂ ሰው ተኮር ሆኖ የዜጎችን ኑሮ በጥራት እንዲያሻሽልና አገልግሎቶችን እንዲያቀልጥ ትልቅ አቅም ይፈጥራል።

በተጨማሪም ይፋ በተደረጉ አገራዊ መረጃዎች መሰረት፣ የዲጂታል 2030 ስትራቴጂ የሞባይል ደንበኞችን ቁጥር 128 ሚሊዮን ማድረስ እና የ5G አውታረ መረብ ተደራሽነትን 100% ማድረስን አልሟል።ይህም የመገናኛ አቅምን በማሳደግ የዲጂታል ክፍተቱን በከፍተኛ ደረጃ ያጠበዋል ተብሎ ይጠበቃል።

በሌላ በኩል የመንግሥት አገልግሎቶችን ሙሉ በሙሉ ወረቀት አልባ ማካሄድ ሌላው ትልቅ ትኩረት ተሰጥቶት የሚሰራበት ሀገራዊ ግብ ነው። ይህም አሰራርን ግልጽ፣ ቀልጣፋና ከሙስና የጸዳ ለማድረግ ከፍተኛ ሚና ይጫወታል።

በአጠቃላይ በዲጂታል ኢትዮጵያ የሚከናወኑ ስራዎች የመደመር መንግሥት በቀለለ ቢሮክራሲ ታላላቅ ስትራቴጂዎችን እውን ለማድረግ ከያዘው ግብ ጋር የተሳሰሩ ናቸው። ለዚህም ስኬት የሁሉም አካላት ትብብርና ቅንጅት ወሳኝ መሆኑ ተጠቅሷል።

በመጨረሻም፣ የዲጂታል ኢትዮጵያ 2030 ስትራቴጂ ስኬት ኢትዮጵያን በቴክኖሎጂ የበለጸገች፣ የወጣቶችን ፈጠራ የምታበረታታ እና ለሀገራዊ ብልጽግና እንደ ቁልፍ ሞተር ሆኖ የሚያገለግል ታላቅ የትራንስፎርሜሽን ጉዞ ነው።