የስፖርቱ ዘርፍ አንድነትንና አብሮነትን በማጠናከር ረገድ የማይተካ ሚና አለው

ጋምቤላ፤ ግንቦት 3/2018 (ኢዜአ)፦ ስፖርት ከሚያስገኘው ዘርፈ-ብዙ የማህበራዊና ኢኮኖሚያዊ ጠቀሜታ ባሻገር፣ የሕዝቦችን አንድነት ለማጠናከርና የወንድማማችነት መንፈስን ለማጎልበት የማይተካ ሚና እንዳለው የጋምቤላ ክልል ርዕሰ መስተዳድር ዓለሚቱ ኡሞድ ገለጹ።

‎''ሀገራዊ መግባባት ለህብረ ብሔራዊ አንድነት'' በሚል መሪ ሀሳብ የኢትዮጵያ ቅርጫት ኳስ 5ኛ ዙር ሀገር አቀፍ የክለቦች ፕሪሚየር ሊግ ውድድር ዛሬ በጋምቤላ ከተማ ተጀምሯል።

 

‎ርዕሰ መስተዳድሯ በማስጀመሪያ መርሃ ግብሩ ላይ ተገኝተው እንዳሉት፤ የስፖርቱ  ዘርፍ ከማህበራዊና ኢኮኖሚያዊ ፋይዳው ባለፈ የህዝቦችን አንድነትና አብሮነትን በማጠናከር ረገድ የላቀ ሚና አለው።

‎በተለይም የቅርጫት ኳስ ስፖርት እንደ ሀገር ረጅም እድሜ ያስቆጠረ የስፖርት አይነት  መሆኑን ጠቅሰው የጋምቤላ ክልልም ከሚታወቅባቸው የስፖርት አይነቶች በቀዳሚነት የሚጠቀስ ነው ብለዋል።

 

‎‎የክልሉ ወጣቶች ያላቸው ተክለ ሰውነትና ለስፖርቱ ካላቸው ከፍተኛ ፍላጎት ጋር ተዳምሮ የቅርጫት ኳስ ስፖርትን የባህል ስፖርት ለማድረግ በትኩረት እንደሚሰራም ርዕሰ መስተዳድሯ  ተናግረዋል።

‎‎የጋምቤላ ከተማ አስተዳደር ከንቲባ አቶ ቱት ጆክ በዚሁ ጊዜ ከክልሉ የወጡ በርካታ ወጣቶች በተለያዩ የስፖርት አይነቶች ተሳትፈው ክልሉን ብሎም ሃገሪቷን ማስጠራታቸውን ተናግረዋል።

 

‎‎‎5ኛው ዙር የኢትዮጵያ ቅርጫት ኳስ የክለቦች ፕሪሚየር ሊግ ውድድር በጋምቤላ ከተማ መካሄዱ ያለውን እምቅ አቅም አውጥቶ ለመጠቀም እድል የሚሰጥ መሆኑንም አቶ ቱት ተናግረዋል።

‎‎ከዛሬ ግንቦት 3 ቀን 2018 ዓ.ም ጀምሮ ለአንድ ሳምንት በሚካሄደው አገር አቀፉ የቅርጫት ኳስ ውድድር አራት የሴቶችና አምስት የወንዶች ቡድኖች በመሳተፍ ላይ መሆናቸውን ከወጣው መርሃ ግብር ለመረዳት ተችሏል።

‎‎በመክፈቻ መርሃ ግብሩ ላይ የጋምቤላና የኢትዮጵያ ስፖርት አካዳሚ የሴቶች የቅርጫት ኳስ ቡድኖች ተጫውተው ጋምቤላ የኢትዮጵያ ስፖርት አካዳሚን 66 ለ 52 በሆነ ውጤት አሸንፏል።