ጠቅላይ ሚኒስትር ዐቢይ አሕመድ (ዶ/ር) በሐዋሳ ኢንዱስትሪ ፓርክ የሚገኙ ፋብሪካዎችን መረቁ

አዲስ አበባ፤ ሚያዝያ 17/2018 (ኢዜአ)፦ ጠቅላይ ሚኒስትር ዐቢይ አሕመድ (ዶ/ር) በሲዳማ ክልል ሐዋሳ ከተማ በሚገኘው የሐዋሳ ኢንዱስትሪ ፓርክ ውስጥ አራት ከፍተኛ የማምረት አቅም ያላቸው ፋብሪካዎች ዛሬ መርቀው ከፍተዋል።

ጠቅላይ ሚኒስትር ዐቢይ አሕመድ (ዶ/ር) በማህበራዊ ትስስር ገጻቸው ባስተላለፉት መልዕክት በሐዋሳ ኢንዱስትሪ ፓርክ የሚገኙት የቶዮ ሶላር ኢነርጅ ሁለተኛው ምዕራፍ፣ ኦርጅን እና ሉሚንቴክ የሶላር ፋብሪካዎችን እንዲሁም የኤች.ዜድ ጋዝ ፋብሪካዎች መመረቃቸውን ገልጸዋል።

‎

የሶላር መሠረተ ልማቶቹ በጋራ በዓመት 11.3 ጊጋዋት ንጹህ ኃይል የሚያመነጩ ሲሆን፤ የኤች.ዜድ ጋዝ ፋብሪካ ደግሞ በዓመት 900 ቶን ኦክስጅን፣ 40,000 ቶን ናይትሮጅን እና 7 ቶን ሃይድሮጅን እንደሚያቀርቡ አመልክተዋል።

አራቱ ፕሮጀክቶች ለዜጎች ሰፊ የሥራ ዕድል በመፍጠር እና የብዙዎችን ኑሮ መደገፍ መቻላቸውንና ከፍተኛ የማምረት ዐቅም ያላቸው ፋብሪካዎቹ የኢትዮጵያም እምቅ ሐብት ወደ ጥቅም የቀየሩም ሆነዋል ብለዋል።