የዲጂታል ባንክ አገልግሎት ተደራሽነትን ለማስፋት የሚከናወኑ ተግባራት ተጠናክረው ይቀጥላሉ

አዲስ አበባ፤ ጥር 12/2018(ኢዜአ)፦ የዲጂታል ባንክ አገልግሎት ተደራሽነትን ለማስፋት የጀመራቸውን ተግባራት አጠናክሮ እንደሚቀጥል የኢትዮጵያ ንግድ ባንክ አስታወቀ፡፡

‎የኢትዮጵያ ንግድ ባንክ 'CBE Connect Digital Wallet' የተሰኘ ከውጭ ሀገር ገንዘብ ለመላክ የሚያስችል አዲስ መተግበሪያ ስራ አስጀምሯል።

‎አዲሱ መተግበሪያ የበለጸገው በኢትዮጵያ ንግድ ባንክ እና ስታር ፔይ ፋይናንሻል ሶሉሽንስ ትብብር መሆኑ በመርሃ ግብሩ ላይ ተገልጿል።

በአገልግሎት ማስጀመሪያ ሥነ-ሥርዓቱ ላይ የኢትዮጵያ ዲያስፖራ አገልግሎት ዋና ዳይሬክተር አምባሳደር ፍጹም አረጋ፣ የኢትዮጵያ ንግድ ባንክ ከፍተኛ የሥራ ኃላፊዎችና ጥሪ የተደረገላቸው እንግዶች ተገኝተዋል።

 

‎በወቅቱ የባንኩ ፕሬዝዳንት ተወካይና የኮርፖሬት አገልግሎት ምክትል ፕሬዝዳንት ኤፍሬም መኩሪያ እንደገለጹት ባንኩ አሰራሩን በየወቅቱ በማዘመን ቀልጣፋና ውጤታማ አገልግሎት እየሰጠ ይገኛል።

‎ዲጂታል ኢትዮጵያን እውን ለማድረግ ባንኩ የዲጂታል ቴክኖሎጂዎችን በማስፋፋት ደንበኞች ቀልጣፋ ተደራሽ እና ዘመናዊ አገልግሎት እንዲያገኙ እያደረገ መሆኑንም አመልክተዋል።

‎ዛሬ ስራ የጀመረው መተግበሪያ የባንኩን የዲጂታል ጉዞ ወደ ላቀ ደረጃ የሚያሸጋግር መሆኑንም ገልጸዋል።

‎ዲጂታል አገልግሎቱ በሀገር ውስጥና በውጭ ሀገር የሚገኙ ደንበኞችን ይበልጥ የሚያስተሳስርና የሐዋላ ሂደትን የሚያቀላጥፍ መሆኑን ተናግረዋል።

‎‎በተለይ ዲጂታል ቴክኖሎጂው የተለያዩ የመገበያያ ገንዘቦችን ማስተናገድ መቻሉ ተጠቃሚዎች እንደ ፍላጎታቸው እንዲገበያዩ ዕድል የሚሰጥ መሆኑንም አስታውቀዋል።

‎ምክትል ፕሬዝዳንቱ የኢትዮጵያ ንግድ ባንክ የዲጂታል ባንክ አገልግሎት ተደራሽነቱን ለማስፋት የጀመረውን ተግባር አጠናክሮ እንደሚቀጥል አስታወቀዋል።

‎የስታር ፔይ ዋና ሥራ አስፈጻሚ በሱፍቃድ ጌታቸው በበኩላቸው፤ ቴክኖሎጂው በኢትዮጵያ የፋይናንስ ዲጂታል ሥርዓት ላይ ትልቅ ለውጥ የሚያመጣ መሆኑን ገልጸዋል።

‎መንግስት ለቴክኖሎጂ ኩባንያዎች የፈጠረው ምቹ ሁኔታ መሰል ፈጠራዎች እንዲበራከቱ ማድረጉን ጠቅሰው፣ በቀጣይም ሌሎች የቴክኖሎጂ ውጤቶችን ለማበልጸግ እንደሚሰሩ አስታውቀዋል።