ህዝበ ክርስቲያኑ የጥምቀት በዓልን ሲያከብር የአብሮነት እሴቱን ይበልጥ በማጠናከር ሊሆን ይገባል

‎ጋምቤላ ፤ ጥር 10/2018 (ኢዜአ)፦‎ ህዝበ ክርስቲያኑ የጥምቀት በዓልን ሲያከብር የመደጋገፍና የአብሮነት እሴቱን ይበልጥ በማጠናከር ሊሆን እንደሚገባ የጋምቤላ፣ የቤንሻንጉል ጉሙዝ አሶሳ፣ የቄለም ወለጋና የደቡብ ሱዳን አህጉረ ስብከትና የሲኖዶሱ አባል ሊቀ ጳጳስ ብፁዕ አቡነ ሩፋኤል ገለጹ።

‎የጥምቀት ከተራ በዓል በጋምቤላ ከተማና አካባቢው በርካታ ምዕመናን በተገኙበት በሊቃውንትና በሰንበት ተማሪዎች ያሬዳዊ ዝማሬ ታጅቦ በታላቅ ድምቀት ተከብሯል። 

 

‎‎ብፁዕ አቡነ ሩፋኤል በዓሉ ላይ ባስተላለፉት መልዕክት፤ የጥምቀት በዓል የኢትዮጵያ ህዝቦች በአንድነትና በአብሮነት ደምቀው የሚታዩበት  በዓል መሆኑን ተናግረዋል።

‎ጥምቀት ሰማይና ምድርን የፈጠረው አምላክ ጌታችን መድሃኒታችን ኢየሱስ ክርስቶስ በመጥምቁ ዮሐንስ እጅ እራሱን ዝቅ አድርጎ የተጠመቀበት የትህትና በዓል ነው ሲሉም ተናግረዋል።

‎‎ምዕመኑ ከዚህ የሚወስደው ትምህርት ጥምቀት የትህትና፣ የፍቅርና የአንድነት በዓል መሆኑን ነው ብለዋል።

‎‎በመሆኑም ህዝበ ክርስቲያኑ የጥምቀት በዓልን ሲያከብር የመደጋገፍና የአብሮነት እሴቱን ይበልጥ በማጠናከር ያለው ለሌለው በማካፈል ሊሆን እንደሚገባ አስገንዝበዋል።

 

‎‎የጥምቀት በዓል ከኃይማኖታዊ ትውፊቱ ባለፈ ኢትዮጵያውያን በዓሉን ለመታደም ከተለያዩ የአለም ሀገራት ለሚመጡ ቱሪስቶች ፍቅርን፣ ትህትናንና አንድነትን የሚያሳዩበት  በዓል መሆኑንም ገልጸዋል።

‎‎ምዕመኑ በዓሉን ሃይማኖታዊ ትውፊቱን በመጠበቅ በፍቅር፣ በትብብርና በአንድነት  እንዲያከብርም ብፁዕ አቡነ ሩፋኤል አሳስበዋል።