የአየር ሀይል የተመሰረተበት 90ኛ አመት ምክንያት በማድረግ ከፍተኛ ዝግጅት የተደረገበት የአየር ላይ ትርኢት ይካሄዳል-ሌተናል ጀነራል ይልማ መርዳሳ

አዲስ አበባ፤ህዳር 21/2018(ኢዜአ)፦የአየር ሀይል የተመሰረተበት 90ኛ አመት ምክንያት በማድረግ ከፍተኛ ዝግጅት የተደረገበት የአየር ላይ ትርኢት እንደሚካሄድ የአየር ሀይል ዋና አዛዥ ሌተናል ጀነራል ይልማ መርዳሳ ገለጹ።

የኢትዮጵያ አየር ኃይል 90ኛ ዓመት የምስረታ በዓል በማስመልከት የ10 ኪሎ ሜትር የጎዳና ላይ ሩጫ በቢሾፍቱ ከተማ ተካሂዷል።

የጎዳና ላይ ሩጫው ‟ለአየር ኃይል ዕድገት በሙሉ አቅሜ እሮጣለሁ” በሚል መሪ ቃል ነው የተካሄደው።

በመርሀ ግብሩ የአየር ኃይል ዋና አዛዥ ሌተናል ጄኔራል ይልማ መርዳሳ፣ የቢሾፍቱ ከተማ ከንቲባ አለማየሁ አሰፋ፣የኢትዮጵያ አትሌቲክስ ፌዴሬሽን ፕሬዚዳንት ኮማንደር ስለሺ ስህን እንዲሁም ሌሎች ከፍተኛ የመንግስት የስራ ሀላፊዎች፣የሰራዊት አባላት እና ጥሪ የተደረገላቸው እንግዶች ተገኝተዋል።

የኢትዮጵያ አየር ኃይል ዋና አዛዥ ሌተናል ጄኔራል ይልማ መርዳሳ በዚሁ ወቅት፥ ሁነቱን ላዘጋጁ አካላት ምስጋና አቅርበዋል።

ኢትዮጵያ ታላቅ ሀገር ናት ሲባል በምክንያት መሆኑን ጠቅሰው፤ የሰው ዘር መገኛ፣ ቅኝ ያልተገዛ ህዝብ እንዲሁም ተስማሚ የአየር ንብረት ያላት ሀገር መሆኗን ተናግረዋል።

የቢሾፍቱ ከተማ 24 ሰዓት በልማት ላይ እንደምትገኝ በመጠቆም የቢሾፍቱ ከተማ እና አየር ኃይል በእጅጉ የተቆራኙ መሆናቸውን አንስተዋል።

የጎዳና ሩጫው የአየር ኃይል የተመሰረተበት 90ኛ ዓመት ምክንያት በማድረግ መከናወኑን ጠቅሰው፤ በቀጣይም ከፍተኛ ዝግጅት የተደረገበት የአየር ላይ ትርኢት እንደሚካሄድ ተናግረዋል።

በተጨማሪም የተለያዩ ሀገራት አየር ኃይል አዛዦች ኮንፈረንስ እንዲሁም የአቪዬሽን ኤክስፖ የምስረታ በዓሉ አንዱ አካል መሆኑን አመላክተዋል።

የከተማዋ ነዋሪዎች እነዚህን ሁነቶች በተሳካ ሁኔታ ለማጠናቀቅ ሚናቸውን መወጣት እንዳለባቸው አስገንዝበዋል።

የጎዳና ላይ ሩጫው በቀጣይ በቢሾፍቱ ከተማ በቋሚነት እንደሚካሄድ ጠቁመዋል።

 

በውድድሩ አሸናፊ ለሆኑ አትሌቶች የአየር ኃይል ዋና አዛዥ ሌተናል ጄኔራል ይልማ መርዳሳ የገንዘብ እና የዋንጫ ሽልማት አበርክተዋል።