ሕብረተሰቡን በማሳተፍ በተከናወነ ሕግ የማስከበር ስራ ሰላምን በዘላቂነት የማረጋገጥ ተግባሩ ተጠናክሯል

ጎንደር፤ ሕዳር 21/2018(ኢዜአ)፡- በማዕከላዊ ጎንደር ዞን ሕብረተሰቡን በማሳተፍ በተከናወነው የሕግ የበላይነትን የማስከበር ስራ ሰላምን በዘላቂነት የማረጋገጥ ተግባሩ እየተጠናከረ መሆኑ ተገለጸ።

በዞኑ የክልሉን መንግስት የሰላም ጥሪ የተቀበሉ የቀድሞ ታጣቂዎች ትጥቃቸውን በመፍታት የተሀድሶ ስልጠና ወስደው ሰላማዊ ህይወታቸውን እየመሩ መሆኑም ተገልጿል። 

በዚህም ሰላምን በማፅናት ምቹ ሁኔታ ከተፈጠረባቸው የክልሉ አካባቢዎች መካከል በማዕከላዊ ጎንደር ዞን የመሀል አርማጭሆ ወረዳ  ተጠቃሽ ነው። 

የወረዳው ሠላምና ጸጥታ ጽሕፈት ቤት ኃላፊ አቶ መስፍን ሀብታሙ ለኢዜአ እንደገለጹት፤ የአካባቢውን ሰላም ለማረጋገጥ በተከናወነው  ስራ የሠላም አማራጭን የሚቀበሉ ታጣቂዎች ቁጥር ከጊዜ ወደ ጊዜ እንዲጨምር አስችሏል።

በዚህም ሕብረተሰቡን በማሳተፍ በተከናወነው ሕግ የማስከበር ስራ ሰላምን በዘላቂነት የማረጋገጥ ተግባሩ ተጠናክሯል ብለዋል።

በወረዳው የተቋቋመው የሠላም ኮሚቴም በአካባቢው የሚንቀሳቀሱ ታጣቂዎች የመንግስትን የሠላም ጥሪ እንዲቀበሉ አስተዋጽኦ እያበረከተ ነው።

በርካታ ቁጥር ያላቸው የታጠቁ ቡድኖች በህዝብ ላይ በፈጸሙት በደል በመጸጸትና የትጥቅ ትግል አዋጭ አለመሆኑን በመገንዘብ ወደ ሰላማዊ ህይወት እየገቡ እንደሚገኙ ተናግረዋል።

በየጊዜው ወደ ሰላማዊ ህይወት የሚመለሱ ታጣቂዎችን የተሃድሶ ስልጠና በመስጠትና የመቋቋሚያ ድጋፍ በማድረግ በልማት ህዝባቸውን እንዲክሱ እየተሰራ ነው ብለዋል።

ለዚህም በሀገር ሽማግሌዎችና በሃይማኖት አባቶች የሠላም ጥረት ታጣቂዎች ወደ ሰላማዊ የልማት እንቅስቃሴ መግባታቸውን በማሳያነት አቅርበዋል።

የወረዳው አስተዳደርም በሰላም የሚገቡ ታጣቂዎች በመረጡት የስራ መስክ ተሰማርተው የበደሉትን ህዝብ በልማት መካስ የሚችሉበትን ሁኔታ እያመቻቸ መሆኑን አስረድተዋል። 

የመከላከያ ሰራዊትና የክልሉ የጸጥታ ኃይሎችም አካባቢውን ቀድሞ ወደ ነበረበት ሰላም ለመመለስ ግንባር ቀደም ሚና እየተጫወቱ መሆኑን አስረድተዋል።  

የሠላም ኮሚቴው በቀጣይም ሌሎች የታጣቁ ቡድኖች የቀረበውን የሠላም አማራጭ ተቀብለው እንዲመጡ እያደረገ ያለውን ጥረት አጠናክሮ እንዲቀጥልም አሳስበዋል።